Naalakkersuisoq: Maanna aalisartuusut tamarmik qaleralittassinneqassapput
![](/sites/default/files/styles/image_934x467/public/article_images/aqqaluaqbegede.jpg?itok=uxTWF2Lc)
Naqqiut 15.40: Allaaserisaq naqqinneqarpoq, ataasiakkaanut aalisagartassiisarnissaq pitsaasuusoq, aalisartulli aalisarneq pillugu ataatsimiititaliarsuup inassutaatut ikinnerulernissaat pitsaasuunngitsoq Aqqaluaq B. Egede isumaqartoq paasissutissiilerluni.
Allaasserisaq aamma naqqitaavoq, taamaalilluni allassimajunnaarluni aalisarneq pillugu ataatsimiititaliarsuaq inassuteqartoq, umiatsiaararsorlutik aalisartut ikinnerulissasut. Ataatsimiititaliarsuaq taama inassuteqanngilaq. Ataatsimiititaliarsuup taamaallaat inassutigaa, meerartagut ernuttagullu aalisarnermik inuussutissarsiorsinnaaqqullugit naammattunik aalisagaqartariaqartoq.
Pisassiisarneq allanngorlugu, aalisartut ataasiakkaat tamarmik immikkut pisassinneqartalissasut, Aalisarneq pillugu Ataatsimiititaliarsuaq inassuteqarpoq.
Qeqertarsuup Tunuani, Uumannami Upernavimmilu qaleralinniartut ullumikkut 1200-nit amerlanerupput. Aalisakkanillu taakkunanni piumaneqartunik siunissami aalisartussat 300 -it missaanniissasut, ataatsimiititaliarsuup inassutigaa.
Ikinnerusunik aalisartoqassanngitsoq aalisarnermut naalakkersuisoq isumaqarpoq.
Aqqaluaq B. Egedep (Inuit Ataqatigiit) kissaatigaa, Sinerissap qanittuani maanna qaleralinniartuusut tamarmik namminneq pigisassaminnik tunisinnaasassaminnillu qaleralittassinneqassasur. Tassalu ataasiakkaanut aalisagartassiisalernissaq isumaqatigaa, aalisartulli ikinnerulernissaat isumaqatiginagu.
Aalisartorpassuit annikippallaamik isertitaqartut
Qeqertarsuup Tunuani qaleralittassat qalerallit allilluanngitsuunniit ullumikkut pisarineqapallattarput. Aalisartut taamaalillutik aalisaqqissinnaalerniassagamik politikerit pisassiissuteqaqqinnissaata tungaanut pisassiissutinik nutaanik noqqaaqqittarput.
Taamalu ingerlasoqarsinnaanngitsoq, Aalisarnermut ataatsimiititaliarsuaq isumaliutissiissummini septembarimi taama naliliivoq. Isumaliutissiissut aalisarnermut inatsimmut nutaamut tunngaviliisuussaaq. Ajornartorsiutaangaatsiartorlu - ataatsimiititaliarsuup oqarnera naapertorlugu - aalisartut amerlavallaat isertitakippallaarput.
AAMMA ATUARUK Naalakkersuisoq til fiskerne: Hvordan vil i have jeres kvoter?
Aalisarnermut ataatsimiititaliarsuaq isumaliutissiissummini allappoq, qaleralinniap ilaquttani napatissinnaassagunigit ukiumut 33 tonsit tulaattariaqarai. Amerlasuulli taamaaliorneq ajorput. Ataatsimiititaliarsuaq naapertorlugu maanna aalisartut 80 procentiinit amerlanerusut taama qaleralinniartiginngillat.
Upperinngikkaa
Taamaammat pisassiissuteqartarnermut aaqqissuussineq allanngortinneqassasoq, ataatsimiititaliarsuaq isumaqarpoq. Umiatsiaararsorlutik qaleralinniartut taamaalillutik ataasiakkaarlugit pisassinneqartassallutik.
Ataasiakkaat namminneq niuerutigisinnaasaminnik pisassaqarnerat nikerartuuvoq. Tamanna aalisartut allanut aalisartunut pisassiissutinik tunisinissaannut pisinissaannullu periarfissaqartitsivoq. Aalisarnerlu taamaaliornikkut qularnaallunilu attanneqarsinnaasoq, ataatsimiititaliarsuaq naliliivoq.
Pisassiissuteqartarnermut aaqqissuussineq atorneqaleraluarpat aalisarnermut naalakkersuisoq Qeqertarsuup Tunuani, Uummannami Upernavimmilu qaleralinnianut 1280-it missaanniittut immikkut qaleralittassiisalissagaluarpoq. Taamaaliortoqarsinnaanersoq taassuma maanna misissulerpaa.
Qulalereerporli. Ima qulartigaaq, allaat pisasseeriaseq siunnersuutaasoq atulerpat aalisartut ikilissasut aarlerigalugu.
- Inuit atugaat akiginagit aaqqissuussinissaq toqqarneqassappat allatut siunnersuuteqartariaqarluta ilisimalereerparput, Aqqaluaq B. Egede oqarpoq.
AAMMA ATUARUK Aalisarnermut ataatsimiititaliarsuup aalisartukinnerunissaa innersuussutigaa: Meeqqatsinnut ernuttatsinnullu naammassapput
Aalisartut kattuffiata, KNAPK-p sinerissap qanittuani umiatsiaararsortut immikkut pisassiissuteqarfigineqartalernissaannut siunnersuut taperserpaa.
KNAPK-lli Uummannami immikkoortortaqarfiata immikkoortortaqarfimminni aalisartut pisassiissutinut atatillugu akerliusut aalisarnermi isumasioqatigiissitsisoqarnerani sapaatip akunnerata siuliani oqaatigaa.
Naalakkersuisup Qeqertarsuup Tunuani, Uummannami Upernavimmilu umiatsiaaqqamik aalisartut tamaasa assigiimmik pisassissagunigit, ukioq manna pisassiissutit oqimaassusaat naapertorlugit, qaleralinniaq ataaseq agguaqatigiisillugu 12 tonsit missaanik ukiumut pisassaateqalissaaq.
- Uani nutaamik siunnersuusiornissarput immini oqariartuuteqareerpoq, taanna malinnagu allanik siunertanik suliaqarnikkut pitsaasumik angusaqarsinnaanersugut qulaajaaffigissagipput, Aqqaluaq B. Egede oqarpoq.