- Taamatut oqitsigisumik tatiginninnginnermik oqariartortoqarnera akuerinngilara. taamaattumik oqaluttarfimmiit minnerpaamik takorusuppara tatigineqannginnera. taannalu arlaataluunniit qaqissagaluarpagu, tassami aalajangerneq ataqqinnillunga tigujumaarpara, aalisarnermut naalakkersuisoq oqarpoq.

Naalakkersuisoq: Taama oqitsigisumik tatiginninnginnermik oqariartortoqarnera akuerinngilara

Jens Immanuelsenip Aalisarnermut ataatsimiititaliamit tatiginnikkunnaarnermik nalunaaruteqarneq ataqqinnilluni tiguniarpaa.

Aalisarnermut ataatsimiititaliaq naalakkersuisumut, Jens Immanuelsenimut tatiginnikkunnaarluni pingasunngornermi nalunaaruteqarpoq.

Aalisarnermut ataatsimiititaliarli nalunaaruteqareernermi kingorna nipaappoq. KNR-ip apeqqutigisaa tassa ataatsimiititaliap naggaterpiaani suna anguniarneraa: Naalakkersuisoq soraarsinniarneraat arlaannaanilluunniit akiumaneqanngilaq.

Tatiginnikkunnaarnermik nalunaaruteqarneq ataasiinnarmit atsiorneqarpoq, tassalu ataatsimiititaliap siulittaasua, Henrik Fleischer Siumumeersoq. Taassuma suliaq pingasunngornermi sisamanngornermiluunniit oqaaseqarfiginerorusunngilaa. Siulittaasup napparsimanini pissutiginerarlugu pingasunngornermi oqaatigaa.

Aalisarnermut naalakkersuisoq, Jens Immanuelsen (S) napparsimanngilaq. Taassuma tatiginnikkunnaarnermik nalunaaruteqarneq oqaaseqarfigerusuppaa.

- Taamatut oqitsigisumik tatiginninnginnermik oqariartortoqarnera akuerinngilara. taamaattumik oqaluttarfimmiit minnerpaamik takorusuppara tatigineqannginnera. taannalu arlaataluunniit qaqissagaluarpagu, tassami aalajangerneq ataqqinnillunga tigujumaarpara, aalisarnermut naalakkersuisoq KNR-imut oqarpoq.

Pakatsivunga

Tatiginnikkunnaarnermik nalunaarut naapertorlugu ”ataatsimiititaliap ernummatigaa Naalakkersuisup pineqartup aalisarnermut inatsisissaq pillugu suliamik ingerlatsinera matoqqasorujussuarmik ingerlanneqartoq, aamma inuiaqatigiinni aningaasarsiornikkut sulisartoqassutsikkullu sunniuteqarluinnartoq torersumik ilisimatitseqatigiiffiusumillu ingerlanneqanngitsoq mianernarsigaluttuinnartoq.

AAMMA ATUARUK Aalisarnermut ataatsimiititaliap siulittaasua: Naalakkersuisumut tatiginnikunnaarpugut

Taamalu oqartoqarnera Jens Immanuelsenip itigartitsissutigaa. Naalakkersuisoq pakatsilluni oqarpoq. Ataatsimiititaliarmi isumaminik annissinissamut periarfissaqarluarnikuunerarpaa:

- Atatsimiititalairsuup sulinera pillugu suliamik qiterparsineq pillugu siusinnerusukkut saqqummiussinerani nalunngilara ataatsimiititaliaq aamma periarfissinneqarnikuusoq. Taamaattumik periarfissamik taassuminnga atuinngitsoorsimanerat uanga akisusaaffigisinnaanngilara, naalakkersuisoq oqarpoq, Nuummilu innuttaasunik ataatsimiititsisimaneq, ataatsimititaliamut periarfissiilluartoq, aamma innersuussutigalugu.

Akisussaaffigaara

Tatiginnikkunnaarnermik nalunaaruteqarnermi Jens Immanuelsen isummaminik aamma allanngueqattaarnerarneqarpoq.

"Suliassat aallartinneqalersaartut aallartinneqareersimasulluunniit pillugit Naalakkersuisup paasissutissiissutaanik ataatsimiititaliaq tigusaqaraangat sivitsunngitsoq Naalakkersuisoq isummaminik allannguisarpoq – eqqarsaatigillannguarnagu siusinnerusukkut ataatsimiititaliamut qanoq paasissutissiisimanini aammalu aalajangiisimaneq allanngortinneqarsimappat tamatuma kingorna ataatsimiititaliamut paasissutissiinnguarnani, nalunaarummi allassimavoq.

Isornartorsiuineq tamanna naalakkersuisup aamma paasisinnaanngilaa.

- Ilisarisinnaanngilara. Peqqutigalugu, uanga naalakkersuinikkut sulininni uannut akisussaafiliunneqartut pillugit minnerpaamik tamatigut uanga siunniussakka Naalakkersuisoqatigiinnut saqqummiuttarpakka, taakkulu aalajangerneqareeraangata, atugassarititai tamaasa nammattarpakka, isumaqataaguma isumaqataanngikkumaluunnit. Suliassara tassaniimmat, Jens Immanuelsen oqarpoq.

Jens Immanuelsen atuuffimmi tassani aalisarnermut naalakkersuisuusimasoq, Nikkulaat Jeremiassen (S) siorna apriilimi tunuarmat naalakkersuisuulerpoq. Naalakkersuisuusimasoq qaleralinniarnerup ilaani aalisapilunneq imaluunniit piujuartitsinermut tunngasut pillugit paasissutissat akerlianik paasissutissiisimaneranik ataatsimiititaliamit isornartorsiorneqarnerata kingunerisaanik tunuarpoq.

Ukiuni qulini kingullerni aalisarnermut naalakkersuisuusimasut quliupput. Taakkunannga marluk marloriarlutik tassani naalakkersuisuupput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat