Naalakkersuisoq ineqarnermut akiliutinik qaffaanissaq pillugu: Pakatsisoqarnera paasisinnaavara
Namminersorlutik Oqartussat inissiiaataasa ilaat januaarip aallaqqaataanit akitsussapput.
Tamanna Naalakkersuisut sapaatip akunnerani matumani siusinnerusukkut nalunaarutigaat.
Akiliutitigut isertitat namminersorlutik Oqartussat najugaqarfiutaanni arfineq marlunni ingerlatsinermut missingersuutaanni naammanngillat. Naammattariaqartut inatsimmi allassimasoq, Naalakkersuisuniit oqarput.
Taamaammallu 4,9 millionit koruuninik pissarsinissaq pisariaqarpoq. Aningaasat aserfallatsaaliigasuarnermut atugassat. Aningaasat taakkua Namminersorlutik Oqartussat najugaqarfiutaanni najugaqarfinni arfineq marlunni najugaqartut akiligassaat.
AAMMA ATUARUK Naalakkersuisut inigisanut akiliutit aappaagu qaffaaviginiaraat
Namminersorlutik Oqartussat inissiiaataanni aserfallatsaaliuiniarnerup ajornartorsiutaanera nutaajunngilaq. Inissiat iluarsartuunnissannut 1,5 milliardit koruunit 2016-imi amigaatigineqarput. Taava sooruna attartortut ajornartorsiummut akiliuteqarlutillu akisussaatinneqassappat?
Tamanna KNR-ip ineqarnermut naalakkersuisumut, Naaja H. Nathanielsenimut apeqqutigaa.
Taassuma ineqarfeqarfinni missingersuutit ingerlaarneranni naligiittoqarnissaa inatsimmi piumasaqaataasoq nassuiaatigaa. Taamaammat amigartoorut najugaqarfinni arfineq-marlunni attartortunit nallimmassarneqassaaq. Taamaammat ineqarnermut akiliut qaffanneqarluni.
- Taamaammat pinasuartumik iluarsartuussassanut atugassanut tunngssuteqartumik ineqarnermut naleqqussaasoqassaaq, Naaja H. Nathanielsen oqarpoq.
Naalakkersuisut inissianut akiliut qaffannissaat ima tunngavilersorpaat:
Ineqarnermut akiliutit pillugit attartortitsinermut peqqussut naapertorlugu ineqarnermut akiliutinik iluarsiisarnermut aqutsinermullu tunngasut tunngavigineqarput, tassungalu ilaatinneqarput inissiaqarfiup ataatsip inissiataani ineqarnermut akiliutinit isertitat tamakkiisut sukkulluunniit aalajangersarneqarnerini najugaqarfiup aningaasartuutissaasa tamarmiusut akilerneqarsinnaanissaat.
Paasissutissarsiffik: Naalakkersuisut
Tamanna attartortut pakatsissutigisinnaagaat Naalakkersuisup paasisinnaavaa.
- Aserfallassimasuni najugaqaraanni erloqinarsinaanera paasisinnaavara, najugaqartullu inissianut aserfallatsaaliorneqartarsimanatik nungullarsimasunut ukiorpassuarni naammagittartariaqarsimammata tupigusuutigineqaannarsinaavoq, ilaatigut ineqarnermut naalakkersuisoq Naaja Nathanielsen oqarpoq. Itisiliivorlu:
- Inimut akiliut kisimi ajornartorsiutaanngilaq, aammami inigisat ussiissiartuinnartillugu kiassarnermut akiliutit taamaapput. Tassalu ajornartorsiut Iluarsaanneqartariaqartut pingaanerpaat iluarsineqanngippata ukiuni aggersuni alliartuinnassaaq, taamaammanuna iluarsaaniartugut, taanna oqarpoq.
Iluliarsuup qaava
Namminersorlutik oqartussat inissiaataasa aserfallassimasut iluarsaattariaqartut ajornartorsiutaaqaat. Taamaammat najugaqarfinni arfineq marlunni iluarsaagasuarnissamut 4,9 millionit koruunit atugassat, ajornartorsiutip ilaminiinnannguaraa. Namminersorlutik Oqartussat najugaqarfiini aserfallatsaaliuinermi naatsorsuutit amigaataasut 1,7 milliardit koruunit 1,9 milliardit koruunillu akornanniinnissaa missiliorneqarpoq.
Ataatsimummi isigalugu Namminersorlutik Oqartussat inissiaataanni iluarsaanissamut aningasat milliardilikkaat atorneqarnissaat pisariaqarpoq:
- Aningaasarpassuit pisariaqartippagut, tassami iluarsaanngitsortarnermi 1,7 milliardit koruunit atortariaqalernissaat utaqqipput, tassalu aningaasaannaanngillat inissianukua akuerineqarsinnanngitsumik pitsaanngissuseqartut. Tassalu ajornartorsiutiviuvoq, ineqarnermut akiliutip qaffakkiartorunnaarsinnarneratigut aaqqinneqarsinnaanngitsut. Annerujussuarmik iliuuseqarnissaq pisariaqarpoq, Naalakkersuisoqatigiillu tamatuma suliarinissaanut piareersimapput, Naaja Nathanielsen oqarpoq.
Namminersorlutik Oqartussat inissiaataannik iluarsaanissamut aningaasanut inatsimmi immikkoortitat Naaja Nathanielsenip oqarnera naapertorlugu aningaasanut inatsimmi aningaasaliissutit ikippallaarsimapput. Aningaasat amerlanerusut pisariaqartinneqarput, qasserpiaassanersulli Naaja Nathanielsenip maannakkorpiaq oqaatigisinnaanngilaa. Naalakkersuisoqarfiulli ataatsimoortumik ilisimasaqalerumalluni inissiat pitsaassusiannik nalilesuinernik katersileruttorpoq:
- Iliuuseqarnissaq pisariaqartoq qularnanngilaq, Naaja Nathanielsen oqarpoq.
Assigiimmik aaqqiissuteqarniartoqartoq
Najugaqarfinni ullumikkut namminerisamik naligiissaakkamik missingersuusiortoqartarpoq. Namminersorlutik Oqartussat najugaqarfiutaasa 16-it affaanni taamaattoqanngitsoq, Naaja H. Nathanielsen nassuiaavoq.
- Taamaammat najugaqarfiit ilaanni assersuutigalugu najugaqarfiit ilaat allanit aserfallannerusimapput, taamaalilluni ineqarnermut akiliutini naleqqussaaneq allanit qaffasinnerulluni, ineqarnermut naalakkersuisoq oqarpoq.
Taamaammat assigiimmik aaqqiissuteqartoqariartorpoq:
- Ineqarnermi naleqqussaasoqarneranut atatillugu aaqqissut ineqarnermi assigiiaarinerusoqaleriartortitsisoqarsinnaanera aamma qimerloorparput, taamaammat aningaasartuutinik naleqqussaanerulernissarput naatsorsuutigineqarsinnaavoq.
- Tamanna ajornakusoortuunera ilisimavarput, Naaja. H Nathanielsen oqarpoq.
Aajukua najugaqarfiit 1. januar 2022-mit ineqarnermut akiliutinik qaffaavigineqartussat: