Naalakkersuisoq: Imminut toqunnermik pinaveersaartitsinissamut nutaamik periusissiortoqarpoq
![](/sites/default/files/styles/image_934x467/public/mimi.png?itok=-GX8cFMJ)
Imminut toqunnermik pinaveersaartitsinissamut periusissiassaq nutaaq suliarineqarpoq.
Ullumi nunarsuaq tamakkerlugu imminut toqunnermut pinaveersaartitsinermi ullorititamut atatillugu isumaginninnermut naalakkersuisoq, Mimi Karlsen (IA) oqarpoq.
AAMMA ATUARUK Politimesteri: Nunatsinni imminut toquttu amiilaarnaannartumik amerlapput
- Tassa suliaq maannakkut aallartipparput taannalu 2022-imi naammassiniassavarput. Suliamut tassunga inunnik assigiinngitsunik suliaqartoqassaaq, tassani isumaginnittoqarfiit, ilinniartoqarfiit, peqqinnissaqarfik, peqatigiiffiit inuusuttullu ornittagaat peqataatinneqarlutik suleqataassapput, isumaginninnermut naalakkersuisoq, Mimi Karlsen oqarpoq.
Kikkut tamarmik akisussaaffimmik tigusissasut
Periusissiami suut ukkanniarneqarnersut erseqqissumik maanna oqaatigisinnaanngikkallarpaa, taamaattorli:
Ikiorneqarnissat pisariaqartippiuk?
Imminut toqunnissamik eqqartsaateqaruit imaluunniit kisimiittutut misigisimaguit Tusaannga oqarasuaammut 801180-imut imaluunniit sms-ikkut 1899-ikkut attavigisinnaavat.
Oqaloqatiginninnerit akeqanngilaq kinaassutsimillu taasisoqartariaqarani.
Tusaannga pillugu uani annerusumik atuagaqarsinnaavutit.
- Soorunami pingaaruteqarluinnaraluarpoq kikkulluunniit tamarmik ikiorneqarnissaat, kisianni tassa taamaanngilaq taamaammat sulineq ingerlajuartariaqarpoq, uagullu naalakkersuisut suliagut ingerlattuartariaqarpagut. Unalu aamma ilaqutariit qanoq atugaqarnerat uani immaqaluunniit qanoq ikiortariaqarnerat nukittorsarneqarnissaallu taana qitiutillugu suliniartuassaagut. Uanilu periusissiassami taanna aamma ilanngukkumaarparput.
Mimi Karlsen oqarpoq nangillunilu:
- Soorunami naalakkersuinikkut sulinissarput pingaaruteqarpoq aamma suliariumaarparput kisianni imminut toqunneq minnerpaaffimmiitinniarutigut pingaaruteqarpoq innuttaasut tamatta ataasiakkaarluta inoqatitta qanoq inneri, taarsiorpata arlaatigut ikiortissarsiorsinnaanerini peqataaniartarnissarput. Ilaa, inuit ataasiakkaarluta sapinngisamik ikiuunnissarput imminut toqunneq pinaveeraartinniarlugu. Taanna qimanngisaannassavarput.
Nunarsuaq tamakkerlugu imminut toqunnissamut pinaveersarartitsinermut ulloritinneqartoq
Septembarip ulluisa qulingat nunarsuaq tamakkerlugu imminut toqunnissamut pinaveersaartitsinermut 2003-miilli ukiut tamaasa ulloritinneqarpoq.
Suliniaqatigiiffiit marluk the International Association for Suicide Preventionip (IASP) World Health Organizationillu (WHO) suleqatigiillutik ulloq pilersippaat.
Tusarfik: WHO
Tassungalu aningaasanik amerlanerusunik immikkoortitsisoqassanersoq Mimi Karlsen suli oqaatigisinnaanngilaa.
- Siullertut periusissiussaagut, periusissiarlu naammassippat aningaasatigut qanoq pisariaqartitsinerluta oqallisigissavarput, naalakkersuisoq oqarpoq.
Naalakkersuisut imminut toqunnissamik pinaveersaartitsinermut periusissiaat 2013-imeersoq 2019-imi atuukkunnaarpoq.