Politimesteri: Nunatsinni imminut toquttu amiilaarnaannartumik amerlapput
Nunarput tamakkerlugu igalaap saani naneruutinik unnugu ikumatitsiviussaaq.
Tassami ullumi ulloq septembarip ulluisa qulingat nunarsuaq tamakkerlugu imminut toqunnissamut pinaveersaartitsinermut ulloritinneqarpoq.
Ilagut akornatsinniikkunnaarsimasut ullumikkut eqqarsaatigaagut. Taamatullu akornatsinniikkunnaartoqartarnera qanoq akiorneqarsinnaanersoq aamma eqqarsaat annertuvoq.
Ikiorneqarnissat pisariaqrtippik?
Imminnut toqunnissamik eqqarsaateqaraanni imaluunniit kisimiittutut misigisimagaani Tusaannga oqarasuaat 801180 imaluunniit sms 1899 kinaassutsimik nalunaaruteqaqqaarani oqaloqateqarnissamik pisariaqartitsigaanni attavigineqarsinnaavoq.
Tusaanga pillugu uani paasisaqarnerusinnaavutit.
Nunatsinni imminut toqunnermut ajornartorsiut annertungaatsiarpoq. Siorna inuit 41-t imminut toqussimasut, imminut toqoriaraluartut 120-t imminullu toqunnissaminnik siorasaarisut 1200-iusut kisitsisit takutippaat.
- Nunatsinni imminut toqussimasut nalunaarsorneqarsimasut qiviarukkit amiilaarnaannartumik amerlapput, politimesteri Bjørn Tegner Bay oqarpoq.
Kisitsisillu taama amerlatigitillugit iliuuseqartoqartariaqartoq, taanna isumaqarpoq:
- Inuiaqatigiit immitsinnut oqarfigisariaqarpugut, ajornartorsiut qaangissagutsigut tamatta iliuuseqartariaqarpugut.
Suleqatigiinnerusariaqarpugut
Imminulli toqunnermut ajornartorsiut qiviassagutsigu, isumaginninnermi peqqinnissaqarfimmilu ilisimasat atorneqarnissaat pingaaruteqartoq politiit oqariartuutigaat.
- Oqartussaasuuvugummi, inuppassuarnut ajornartorsiortunut, soorlu imminut toqunnisssamik eqqarsaateqartunut attaveqartartut, inuillu imminut toqussimasut pillugit suliaqartarluta. Uagullu iliuuserisinnaasarput tassaavoq, sulisuvut inunnik ajornartorsioqisunik oqaloqatiginnissaannut piareersarluarlugit.
Septembarip ulluisa qulingat nunarsuaq tamakkerlugu imminut toqunnissamut pinaveersaartitsinermut 2003-miilli ukiut tamaasa ulloritinneqarpoq.
Suliniaqatigiiffiit marluk the International Association for Suicide Preventionip (IASP) World Health Organizationillu (WHO) suleqatigiillutik ulloq pilersippaat.
WHO-p kisitsisaatai naapertorlugit, nunarsuaq tamakkerlugu imminut toquttut ukiumut 700.000-it missaanniittarput.
Nunarput imminut toquttut pillugit nalunaarsuusiornermi kingullermi kisitsisinit 2019-imeersunit aallaavilimmi ilaatinneqanngilaq.
Nunami Lesothomi imminut toquttoqarnerpaavoq. Lesothomi inuit 100.000-iugaangata 72,4-t imminut toqussimasutut 2019-imi nalunaarsorneqarput.
Nunatsinnut kisitsisinut nutaanerpaanut sanilliussissagutta, nunatsinni inuit 100.000-iugaangata 73-it imminut toquttutut nalunaarsorneqarput.
Tusarfik: WHO
Taakku saniatigut politiit, isumaginnittoqarfimmi oqartussat aamma peqqinnissaqarfik suleqatigiinnerunissaminnik anguniagaqarput.
- Suliani imminut toqunnermut tunngasuni politiit saaffissani kisimiittarput.
- Taava saaffiginnittoq saaffiginnilussinnaqattaaqqunagu imminut toqunnissamik eqqarsaateqartoq immaqaluunniit qanigisaasoq politiinut sianerpat, uagut oqartussaasutut oqartussanut allanut attaveqarnissamut sullitattalu saaffissanut eqqortunut saaffiginnissunnisssaannut pisussaaffilernikuuvugut.
Sumiiffinni aaqqissuisoqassaaq
Nunarsuaq tamakkerlugu imminut toqunneq akiorniarlugu ullumi ullorititaasoq nunarput tamakkerlugu malunnartinneqassaaq.
Nunatsinni illoqarfiit aqqanillit nunaqarfiillu 13-it sammisassaqartitsinissamut aningaasaliiffigineqartut naalakkersuisunit ilisimatitsipput.
Sumiiffigisanni sunik aaqqissuussisoqassanersoq paaserusukkukku komunerisappit nittartagaani facebookianilu misissorsinnaavat.