Naalakkersuisoq: KANUKOKA oqaloqatigiinnermut kigaalaqutaavoq

Anthon Frederiksen ima nangippoq:

- Suliassat KANUKOKA-kkoortarneri piffissamik assut atuisarput, oqarpoq.

Demokratineersup Niels Thomsenip kommunalbestyrelsenut qanittukkut KANUKOKA atorunnaassasoq oqallissaarutigaa, isumaqarluni kommunit sisamaannanngoreermata Namminersorlutik Oqartussanut oqaloqatiginninnissaminnut kattuffimmik akunneqartariaqanngitsut.

Borgmesterit amerlanerussuteqartut oqallinnermut akuliutereerput oqarlutik, KANUKOKA pisariaqartoq, kisiannili suliassai allanngortariqartut.

Maannalu naalakkersuisunut ilaasortaq, kommuninik toqqaannartumik suleqateqartoq, akuliuppoq.

- Kommunit namminneerlutik kattuffeqarnertik kiffaangissuseqarfigaat, taannalu Naalakkersuisuni akuleruffigisassarinngilarput.

Anthon Frederiksen taama oqaraluarluni nassuerutigaa, nammineq inissisimaffimminiit isigalugu, kommunit toqqaannartumik oqaloqatigisarnissai pitsaanerpaasoq.

- Nunarput angisoorujussuuvoq, kommunillu namminneq iluminni pissusaat assigiinngitsorujusuupput. Taamaammat kommunit namminneq kommuneqarfimminni pissutsit qanoq ittuusut ilisimanerpaavaat. Aammalu kommunit ataasiakkaat tamarmik assigiimmik aalajangersaaffigisinnaaneri killeqartarpoq, naalakkersuisunut ilaasortaq oqarpoq, taamaammallu kommunit ulluinnarni ingerlatatik atukkatillu pillugit toqqaannartumik Naalakkersuisunit apuussisarnerat iluarisimaarlugu.

Illuanilli aamma kommunit kattuffeqarnerat pitsaaquteqartoq, nunamut namminermut naalakkersuisup nassuerutigaa.

- Paasissutissat, kommunit sisamat assigiinngitsut akornanni pissutsinut tunngasut, KANUKOKA-p katersortarmagit, nunamut tamarmut ataatsimoortumik naliliissatilluni, KANUKOKA-p ilisimasai atorluarneqartarput, Anthon Frederiksen naggasiivoq.