Naalakkersuisoq illersornissamullu ministeri innuttaasunut ataatsimiititsinissamut aggersaasut
Nunanut allanut, Inuussutissarsiornermut, Aatsitassanullu Naalakkersuisoq Múte B. Egede (IA) aamma illersornissamut ministeri, Jeppe Bruus (Socialdemokratiet) Narsarsuarmi Qassiarsummilu innuttaasunut ataatsimiititsissapput.
Septembarip qulingiluaanni ataatsimiititsisoqassasoq, Naalakkersuisoqarfik tusagassiuutinut nalunaarummi paasissutissiipput.
Innuttaasunut ataatsimiititsinissaq Narsarsuup illersornissaqarfiup Arctic Shieldimik taallugu septembarimi pingaarnertut sungiusarfigineqarnissaanik pissuteqarpoq. Nunatta kujasissortaa kiisalu Kangerlussuup eqqaa nunakkut, imaatigut silaannakkullu septembarip arfineq-aappaannit 18-iata tungaanut sungiusarfigineqassapput.
Sakkutuut NATO-mi nunanit qulit missaanneersuneersut 400-t missaanniittut sungiusaqataassasut, Illersornissamut ministereqarfik paasissutissiivoq.
Naalakkersuisup ministerillu oqarnerat naapertorlugu sungiusartoqarnissaa Narsarsuup siunissaanik oqaloqatigiinnissamut pissutissiivoq.
Innuttaasut ernumasut
Innuttaasunik ataatsimiititsinermi misilittakkanik avitseqatigiittoqarsinnaallunilu nunaqarfiup siunissaa pillugu apeqquteqartoqarsinnaassasoq, tusagassiuutinut nalunaarummi allassimavoq.
Narsarsuarmi innuttaasunut Klubbimi nalunaaqutaq 11.45-mit 13.15-imut ataatsimiititsisoqassaaq. Qassiarsummilu Ortooqqap Atuarfiani nalunaaqutaq 14-imit 15.30-p tungaanut ataatsimiititsisoqassalluni.
Narsarsuarmi innuttaasut arlallit nunaqarfiup siunissaa siusinnerusukkut ernumassutiginerarpaat. Tusarfiit arlallit sumiiffimmi takornariaqarneq aasaq manna annikinnerulingaatsiarsimasoq, KNR-imut oqaatigaat.
Tamanna Qaqortumi mittarfiup apriilimi ammarnerata kingorna pivoq. Tamanna pissutigalugu Mittarfik Narsarsuup ingerlanneqarnera annikinnerpaaffissaminiitsinneqarpoq.
Narsarsuaq Kangerlussuarlu Amerikamiut sakkutuuisa sakkutooqarfissatut misissuiffigisaasa pingasut ilagigaat, New York TImesimi apriilimi ilanngutassiami oqaatigineqarput. Tamanna nunatta Danmarkip, USA-llu akornanni qaffasissumik atorfillit suleqatigiissitat isumaqatigiinnialeruttornerannut atatillugu pivoq.
Narsarsuaq Amerikamiunit 1941-mit 1958-imut sakkutooqarfiunikuuvoq.
Nunanut allanut, Sillimaniarnermut, Illersornissamullu Politikkikkut Ataatsimiititaliami Issittumi Atlantikup Avannaanilu pissutsit pillugit oqaluuserinniffiusumik ataatsimiinnerup aqaguani Nunatta kujataanut tikeraartoqassaaq.
Nunatta, Danmarkip Savalimmiullu naalagaaffeqatigiit ukiup affakkaartumik ataatsimiinneranni tamanna pissaaq.
Nuummi ataatsimiittoqassaaq, tassanilu naalakkersuisuni siulittaasut pingasut aamma nunanut allanut naalakkersuisut nunanit pingasuneersut peqataassapput.
