Illersornissaqarfiup Narsarsuarmi mittarfiup atuuffissaa sivitsoraa
Danskit illersornissamut ministereqarfiat Narsarsuup mittarfiata atuuffissaata sivitsorneqarnissaanut tapiissuteqarusuppoq. Folketingimi aningaasanut ataatsimiititaliap katillugit 45 millionit koruuninik 2026-mi 2027-milu tapiissuteqartoqarnissaanut akuersissuteqarnissaa ministereqarfiup kissaatigaa.
Tamanna illersornissamut ministereqarfimmit Folketingimi aningaasanut ataatsimiititaliamut allakkami allassimavoq.
- Illersornissamut ministereqarfiup Namminersorlutik Oqartussat Narsarsuup mittarfianik ingerlatsinerannik sivitsuinissamut aningaasartuutit katillugit 45 millionit koruuniupput. Suliniut 2026-mi 2027-milu ukiumut 22,5 millionit koruuninik aningaasartuuteqarfiussaaq, illersornissamut ministereqarfik allappoq.
Namminersorlutik Oqartussat ingerlatsineranni innuttaasunik sullissinerit, ilaatigut kiassarnermik pilersuineq, upalungaarsimaneq, orsussamik pilersuineq aamma kuuffinnik aserfallatsaalineq ilaapput, aningaasallu taakkununnga aamma atorneqassapput.
Politikerit Qaqortumi mittarfiliornissamik aalajangermata Narsarsuarmi mittarfiup ukioq manna apriilimi qulimiguulinnut mittarfinngortinneqarnissaa pilersaarutigineqarpoq.
Narsarsuarmili mittarfiup sakkutooqarnermut atorneqarsinnaanissaanik oqallinnerup aallartinnginnerani tassa 2018-imili taama aalajangiisoqarpoq.
Mittarfilli qulimiguulinnut mittarfiinnanngortinneqarani mittarfittut teknikkikkut attatiinnarneqarpoq. Ingerlatsinerli minnerpaaffissaaniitsinneqarpoq.
Kommune Kujallermi borgmesterip, Malene Vahlip (D) mittarfiup sakkutooqarnikkut siunissami atorneqarsinnaanissaa qulakkeersimannginnera pissutigalugu mittarfittut inissisimanera suli atuutsinneqartoq siusinnerusukkut oqaatigaa.
Borgmesterip oqarnera naapertorlugu kommune nunatta, USA-p Danmarkillu akornanni sillimaniarnermi isumaqatiginninniarnerit naammassitinnagit Narsarsuup siunissaanut atatillugu aalajangiisinnaanngilaq.
Danskit illersornissamut ministereqarfiata mittarfiup aserfallannginnissaa aalajangiisoqartinnagu aamma qulakkeerusuppaa.
- Illersornissamut qullersaqarfiup Narsarsuup mittarfiata sakkutooqarnikkut pisariaqartitanik aalajangiisoqarnissaanut minnerpaaffissamiitsitsilluni ukiumi ataatsimi ingerlatsisoqarnissaanik qulakkeerisoqarallarneqarnissaa innersuussutigaa.
- Illersornissaqarfiup iligisallu mittarfiup sakkutooqarnikkut pisariaqartinneqarneranik qulaajaanerat ilutigalugu minnerpaaffissamiitsitsilluni ingerlatsinikkut mittarfiup issittumi silap pissusianik aserfallanneqannginnissaa qulakkeerneqassaaq, allaatigisami allassimavoq.
Allaatigisaq Folketingip aningaasaqarnermut ataatsimiititaliaa tulliani sisamanngorneq septembarip qulinganni ataatsimiilerpat oqaluuserisassaniissaaq.
