Martha Lund Olsen: Innuttaasut ataatsimeeqatiginanga bingorusunnerupput
Meeqqanik sumiginnaasarneq pillugu oqallinnissaq tunulliullugu innuttaasut bingorusunnerunerat ataatsimiititsinermi tassani takuaa:
- Inuit taama amerlatigisut saneqquaannarneri tupigusuutigaara. Eqqannguatsinni bingortoqarnera pissutigalugu. Martha Lund Olsen, innuttaasunik ataatsimiititsinerup 20-t missaannaanik peqataaffigineqartup kingorna ugguarluni taama oqarpoq. Amerlanerusummi peqataanissaat kissaatigigaluarpaa.
- Soorunami uggoraara, aamma innuttaasunik ataatsimiititsigaangatta suna taama soqutiginanngitsiginersoq eqqarsaatigaara?
Taamaammat ataatsimiititseriaatsip allanngortissinnaanera isumaliutigaa. Ilaatigut immaqa innuttaasunik ataatsimiititsinerit pinnattaassaqartitsilluarluni bingortitsinermik akunniliiffigisarlugit.
- Ataatsimiititseriaaserput allanngortittariaqarparput, immaqalu pinnattaassaqartitsilluarluta bingortitsinermik akunniliisarluta. Aamma kulturikkut aaqqissuussinerusinnaavoq, soorlu nipilersortitsilluni. Innuttaasunik ataatsimiititsineq soqutiginarsarnerullugu, isumaginninnermut naalakkersuisoq, Martha Lund Olsen, taama naggasiivoq.