Naalakkersuisoq qimmini sungiusarniarlugu hashimik toqqorsisimavoq

Ikiaroornartup akiorniarneqarnissaanut suliniutinut atatillugu Agathe Fontainip siunnersuutai, Inatsisartuni sapaatip akunnerata siuliani oqallisigineqarmata oqallinneq allamut sangutinneqarpoq

Allattoq Ivik Kristiansen, Laura Aggernæs

maajip 05-at 2015 15:14

Inatsisartut ikiaroornartoq pillugu oqallisileruttorneranni Siverth K. Heilmann Ineqarnermut Naalakkersuisuunermini Naalakkersuisutut siulimi karsimi aningaasiviani ikiaroornartumik aningaasanillu imalimmik nassaarsimalluni oqaluttarfimmit oqaluttuariataarpoq.

- Siorna, ineqarnermut Naalakkersuisuutillunga Naalakkersuisoqarfinnut apuunneqarujoq, aningaasivik hashimik, aningaasanik, partiip pigisaanik bankbogimik imalik Naalakkersuisuusimasullu aqqanik allassimasup iniginikuusaata naqqup iluani nassaarineqarsimasoq, Siverth K. Heilmann Inatsisartut oqaluttarfianninngaanniit pingasunngormat oqarpoq.

Karsi aningaasivik politiinut tunniunneqarsimasoq, Siverth K. Heilmannip aamma oqaatigaa.

Naalakkersuisuusimasoq, Partii Nalerarlu sinnerlugu Inatsisartuni ilaasortap, Anthon Frederiksenip hashimik piginnittuulluni kingusinnerusukkut nassuerutigaa.

- Naalakkersuisuusimasut allat pasillerneqannginnissaat piniarlugu uanga najugarisimasanni ikiaroornartumik nassaartoqarsimammat oqaatigissavara, Anthon Frederiksen oqaluttarfimminngaanniit oqarpoq, nangillunilu.

- Uggornaraluartumik ajuusaarnartumillu taakku ikiaroornartuminikasiit politiiniit pissarsiarisimasakka, puiorneq annerusumik immaqa pissutaalluni utertinneqanngitsoornikuusimapput. Aammalu iluamik toqqorluarsimanerat pissutigalugu nuunnitsinni utertissallugit arajutsivillugit arajutsisimavakka, Anthon Frederiksen oqarpoq.

Aamma atuaruk Josef Motzfeldt: Oqaluttuaq uannut tamaanga killeqarpoq

Pisimasoq ajuusaarutigalugu oqaatigeriarlugu ikiaroornartoq Anthon Frederiksenip illuminut qanoq isilluni pisimanersoq nassuiarpaa.

- Ukiuni 15-it missaanni ikiaroornartulerisutut politiini qimmeqarlunga sulinikuuvunga, tamanna sioqqullugu. Taamanikkullu pissutsit imaattarput, politiit ikiaroornartulerisunik qimmillit politeeqarfimminngaaniit ikiaroornartumik tunineqartarput, sungiusaanermut atorneqartartunik, Anthon Frederiksen oqarpoq.

Suliaq politimestereqarfimmit suliarineqartoq Anthon Frederiksenip aamma oqaatigaa.