Josef Motzfeldt: Oqaluttuaq uannut tamaanga killeqarpoq
![](/sites/default/files/styles/image_934x467/public/article_images/josef_motzfeldt_1b2ad7.jpg?itok=F_lO4yl8)
- Oqaluttuap aallartinneraniilli ilisimalluinnaqqissaarpara qanorluunniit politiit aalajangiigaluarpata inatsisiliornikkut naalakkersuinikkullu taavalu eqqartuussiveqarnerup pinerluttaalisitsinerullu immikkorluinnaq inissisimanerat najoqqutaralugu politiit aalajangernerat sunaagaluarpalluunniit ataqqisussaallugu. Taamaammat politiit suliaminnik nammineq maleruagassat najoqqutaralugit suliaqarsimasut naammassinnissimasutullu nalilerpara. Taamatut inerneqarnera uannut soorunami oqiliallannaqaaq, Joesf Motzfeldt oqarpoq.
Suliaq Inatsisartuni oqallisigineqarnissaa ilimanarsinnaavoq. Inatsisartuni sulinermik kalluaasinnaassava?
- Politiit qanorluunniit aalajangernerannut inatsisartut ataqqinnittussaanerat matumani aamma atuutissasoq naatsorsuutigilluinnarpara. Taamaammat oqaluttuaq uannut tamaanga killeqarpoq, taavalu suliassat pingaartut allat ingerlateqqinnissaannut piareersimallunga Siulittaasoqarfimmut siulittaallunga uteqqippunga, Inatsisartut siulittaasuat oqarpoq.
Illuatungiliuttuni siuttoq Aleqa Hammond politimesterip suliamik unitsitsiinnarneranik isornartorsiuivoq. Tamanna qanoq isumaqarfigaajuk?
- Taanna nammineq Siumup siulittaasuata politiillu akornanni suliassatut isigalugu oqaaseqarfigissalluguluunniit pisariaqartinngilara, Josef Motzfeldt oqarpoq.
Inatsisartut siulittaasuat Josef Motzfeldt taama oqarpoq. Politimesterip suliamik unitsitsinera Siumup siulittaasuanit Aleqa Hammondimit isornartorsiorneqarpoq.
Suliamik unitsitsineq inuiaqatigiinni inatsisitigut illersorneqarsinnaanngitsumik alloriarnerusoq, Aleqa Hammondip oqaatigaa.
- Ikiaroornartumik angerlarsimaffimminiititsineq kingunertinneqarsinnaanngippalluunniit inuiaqatigiittut taava sumut killissimassasagut? Aleqa Hammond aperivoq.