Naalagaaffinngornissamut naalakkersuisoqarfik eqqaaneqanngitsoq

Naalakkersuisunngortussatut naalakkersuisoqarfissatullu innersuussat tallimanngornermi saqqummiunneqarmata, naalagaaffinngornissamut naalakkersuisoqarfik maannamut atuuttoq eqqaaneqanngilaq. Tassalu naalakkersuisoqarfittut ingerlaqqittussatut innersuunneqanngilaq.

Naalagaaffinngornissamulli suliat nanginneqassasut nunanut allanut tunngasunut naalakkersuisussatut innersuunneqartoq oqarpoq.

- Pilersaarutaapput qulequttat, paragraf 21-mut tunngasut suliakkiissutigineqassasut suleqatigiissitamut tassa kommissioneeqqamik suliaqartoqassasoq, taakku suliassat nanginneqassapput, Vivian Motzfeldt KNR-mut oqarpoq.

Pitsaanngitsoq

Taanna naalagaaffinngornissamut qinigaaffiup siuliani naalakkersuisuuvoq.

Naalagaaffinngornissamut nunanullu allanut tunngasut naalakkersuisuuneq Vivian Motzfeldtip kisiartaalluni misilittagaqarfigaa. Tamannali pitsaanngitsutut nalilerpaa.

- Naalakkersuisumut ataatsimut naammaassineqarsinnaanngitsoq tassaavoq nunani allani pisussaaffippassuit suliariutigalugit nunap immikkoortuini inoqarfiit tamaasa tikissallugit, Vivian Motzfeldt Siumumi siulittaasuugallartoq oqarpoq.

Siumup anguniagaa illua-tungilerneqarpa?

Siumut Qasigiannguani 2023-imi ataatsimeersuarpoq. Naalagaaffinngornissaq piareersarniarlugu naalakkersuisoqarfiliortoqarnissaa ataatsimeersuartut, tassa Siumup qullersaasa, anguniagassatut aalajangerpaat. Tamannalu qinigaaffimmi maanna qaangiuttumi angungaluarpaat.

KNR-ip siulittaasuugallartumut taama maanna iliorneq partiip Siumup anguniagaanik akerliliinerunnginnersoq apeqqutigaa. Sulialli nanginneqartussat innersuunneqarput.

- Apeqqutaavallaanngilaq immaqa qulequttat qanoq ittut aallaavigalugit naalakkersuisoqarfiit pilersinneqarnersut. Kisianni suliakkiissutigineqartut taakku nangittumik ingerlassasut. Taanna allanngortitsinngilaq alloriarfimmi nutaami, Vivian Motzfeldt oqarpoq.

Qisuarianngitsoq

KNR-ip naalakkersuisunut ilaasortassatut naalakkersuisoqarfissanillu innersuussinermi saqqummiisoq, tassa naalakkersuisut siulittaasussaat, Jens-Frederik Nielsen, naalagaaffinngornissamut naalakkersuisoqarfiup atuuttussatut innersuussinermi taaneqannginnera pillugu attaveqarfigigaluarpaa.

Naalakkersuisulli siulittaasussaattut innersuunneqartoq saaffiginnissummut ilanngutassiap suliarinerani akinngilaq.