Naalagaaffeqatigiit ataatsimiinnerat Thorshavnimi pivoq
Naalakkersuinikkut siuttut pingasuusut ataatsimiinnissaat pillugu qulequtaqanngilaq, tassami naalagaaffeqatigiinnerup iluani ataatsimiittarnerit pillugit aalajangersimasumik malittarisassaqanngilaq. Kisiannili nunani taakkunani pingasuusuni naalakkersuinikkut ajornartorsiutit isumaqaatigiinngissutaasinnaasullu oqaluuserineqarsinnaapput.
Tusarfinnit tutsuiginartunit ilisimatitsissutigineqarpoq issittumi ataatsimoorussamik periuuseqarnissaq, Nuummi maajimi ingerlanneqartumut malitseqartitsinertut ilanngullugu, ilaatigut oqallisigineqartussaasoq. Tassunga atatillugu Kangilinnguani sakkutooqarfiup Savalimmunilu sakkutooqarfiup kattunneqarnerisigut, issittumi sakkutooqarfissap sumiinnissaa oqaluuserisassanut ilaassasoq naatsorsuutigineqarpoq.
Ilanngullugu Nuummi parnaarussivissap matoqqasup sumut inissinneqarnissaanut tunngatillugu, kikkut aningaasaliinissaanut apeqqut oqaluuserineqartussanut ilaavoq. Manna tikillugu naalagaaffik Kommuneqarfik Sermersuup nunaminertamut innersuussimasaanut, Nuummi saviminernut eqqaaviup eqqaaniittumut tunngatillugu, nunagissaanissamut akileerusussimanngilaq.
Aammattaaq issittumi uuliasiornermut atatillugu sillimaniarnikkut minnerpaaffiliinissaq pillugu ataatsimut isummernissamut, CIA-llu Kalaallit Nunaata silaannartaani tigusanik timmisartuussisarsimagaanerat ilanngullugu, sukumiisumik misissorneqarnissaanut apeqqutip oqaluuserineqarnissaa naatsoruutigineqarsinnaavoq.
Naalagaaffeqatigiinnerup iluani ataatsimiinnissaq Savalimmiuni naalakkersuisut qullersaqarfianni, Tinganesimi ingerlanneqassaaq. Tamannali pitinnagu naalakkersuinermi suliallit nuliatik peqatigalugit Mykinesimut angalaaqqaassapput. Qallunaat kalaallillu aallartitaat Savalimmiuniit aqagu aallassapput.
Kuupik Kleist marlunngornermi Bruxellesimut ataatsimiinnernut arlaqartunut, ilaatigut EU Parlamentip aallartitaanik, EU Komissionimik kiisalu NATO-mik ataatsimeeqateqariartorluni aallassaaq.
