Naajap tunuarnerata kingorna IA mianersortumik akissuteqarpoq
Naaja Nathanielsenip Inuit Ataqatigiinnit tunuarnera tallimanngormat nalunaarutigineqarmat tamanna partiip siuttuinit naatsuinnarmik qisuariarfigineqarpoq, ilaatigut 'tunuarnera ajuusaarutigaarput' aamma 'aalajangernera tusaatissatut tiguarput'.
Urani pillugu innuttaasunik taasititsisoqassappat tamatuma inerneranik partii ataqqinnissanersoq partiimit erseqqissumik nalunaarutigineqarsimannginnera Naaja Nathanielsenip partiimit tunuarnerminut ilaatigut pissutaatippaa.
Aamma atuaruk Nathanielsen: Nunarput qimaasunik aalajangersimasunik amerlassusilinnik tikisitsili
- Uranisiornissaq akerlerilluinnarpara, innuttaasunilli taasititsinissamik kissaateqarluni saqqummiusseriarluni innuttaasut aalajangiussaannik naalaarnissamut piareersimassanngikkaanni tamanna tatiginanngitsutut isumaqarfigaara, Nathanielsen tusagassiorfinnut nalunaaruteqarluni tallimanngormat taama allappoq.
Inuit Ataqatigiilli tusagassiorfinnut nalunaarutaanni marlunngormat nassiunneqartumi ilisimatitsissutigineqarpoq uranisiornissaq pillugu innuttaasunik taasititsinissamik Inatsisartut upernaakkut ataatsimiinneranni partii siunnersuuteqarniartoq - taasititsinerullu inernera partiip ataqqiumaaraa.
- Innuttaasunik taasititsisoqassappat, tamatuma qanoq ilusiligaanissaa Inatsisartunit aaqqissuunneqassaaq.
Innuttaasunilli taasititsisoqassappat tamanna qanoq 'aaqqiissuunneqassanersoq' partiip ilisimatitsissutiginngilaa.
Qimaasunik tikisitsisoqassava imaluunniit?
Inuit Ataqatigiit marlunngormat tusagassiorfinnut nalunaaruteqarnerisa kingorna, partiip siulittaasuata Sara Olsvigip siulittaasullu tulliata Aqqaluaq B. Egedep pisortatigoortumik oqaaseqartinnissaat pisinnaasimanngilaq.
Qimaasunik Nunatsinnut tikisitsinissaq ilaatigut qanoq isumaqarfigineqarnersoq KNR-ip apeqqutigerusukkaluarpaa.
Nunatta nunarsuarmioqatigiittut akisussaaqataanerunissaa Inuit Ataqatigiinnit siornatigut oqaatigineqarsimavoq. Naaja Nathanielsenili naapertorlugu qimaasunik aalajangersimasumik amerlassusilinnik Nunatsinnut tikisitsinissamik siunnersuutini kisimiissutigisimavaa, taamaammallu Inatsisartuni attaviitsutut siunnersuutiginiarlugu aalajangersimalluni.
Taarsiullugu Inuit Ataqatigiit nalunaarutigaat sammineqartoq Inatsisartuni upernaaru oqallisigineqarnissaa partiip kissaatigigaa.
- Ammasumik isummersoqatigiinnissaq pisariaqarpoq, nunarsuarmioqataanerullu anersaavani iliuuseqassagutta tamat peqataaffigisinnaasaannik iliortariaqarpugut, partii allappoq, suliallu politikkimut tunngassuteqaannannginnera aamma oqaatigalugu.
Aamma atuaruk Naaja Nathanielsen IA-mit tunuarpoq
Naalagaaffimmit ataatsimoortumik tapiissutit akerleriissutaasut
Naalagaaffiup Nunatsinnut ataatsimoortumik tapiissutaata ukiumut 10 millionit koruuninik ikilisikkiartuaarnissaannik Inuit Ataqatigiit ukiortaami siunnersuuteqarnerat Naaja Nathanielsenip aamma akueriuminaatsippaa.
- Inuit Ataqatigiinni aningaasaqarnermut oqaaseqartartuugama soorunami tamanna ajornartorsiutitut isigaara, Naaja Nathanielsen allappoq.
Naalagaaffiulli ataatsimoortumik tapiissutaasa ikilisittariaqarnerat partiip marlunngormat nalunaaruteqarnermi aalajangiusimaannarpaa, taamatulli isummerneq partiimi isumaqatigiissutaasimanersoq ilisimatitsissutigineqanngilaq.
- Ataatsimoortumimmi tapiissutit amerlassusaasa aalajangiusimaannarnissaat namminersorluni oqartussaaneq pillugu isumaqatigiissummi siunertaanngilaq. Inuit Ataqatigiinnit kingumut erseqqissumik oqaatigeqqissavarput apeqqut taanna ammasumik oqaloqatigiissutigalugulu suleqatigiissutiginissaa kissaatigigatsigu.
