Naaja: Uuliamut akitsuusiinissaq isumassarsiatsialaavoq

Kalaallit Nunaanni uuliap akia appasippoq, uuliap akianut akitsuuteqanngimmat.

Uuliamik atuinermi aningaasartuutigineqartut uuliap akianut naapertuunnersut apeqquserneqarsinnaavoq, assersuutigalugu pinngortitap mingutsinneqarnera  eqqarsaatigalugu. Taamattumik siunissaq eqqarsaatigalugu nalimmassaasoqartussaasoq, Naaja Nathanielsen oqarpoq.

-Pinngortitap avatangiisillu pillugit Naalakkersuisoqatigiit aarlerisaarinikuupput. Nukissiuutit orsussaannik akitsuusiisoqareerpoq. Biilit innaalagissamik orsutortut akitsuuserneqannginnissaat aalajangiunneqarnikuuvoq. Tamakkuupput avatangiisip illersorneqarnissaanut iliuutsit, Naaja Nathanielsen oqarpoq.

Uuliap benzinallu kisimik akitsuuserneqarnissaat isumaqatiginartinngilaa, avatangiisinut suliniutit tamakkiisumik iluuseqarfigineqarnissaat pingaaruteqarnerunerarlugu.

Nukissiuutit orsussussaannik pinngitsuuisinnanngitsut assigiinngillat, tassalu aalisartuusinnaavoq, innuttaasuusinnaavoq nalinginnaasoq aamma suliffiutiliusinnaavoq. Tamakkua tamaasa politikkikkut sulinitsinni ilisimaarivagut, taamaattumillu akileraarutinik akitsuutinillu ukiamut ataatsimiinnissami eqqartuissalluta eqqarsaatigarput, Naaja Nathanielsen oqarpoq.

Avatangiisinut iluaqutaasinnaasunik tapiissuteqariaatsimik aamma avatangiisit mianerinerurnissaanik suliniuteqartunut aningaasaliisarnissaq siunniunneqarput, tamanna ilaatigut avatangiisinut mingutitsinerit allat siunissami takussaalernissaannik naatsorsuutigisaqarnermik pissuteqarpoq.

- Taamaattumik uuliamik atuisut tamakkununnga akileeqataasalissapput Inatsisartuni avatangiisit pillugit ataatsimiititaliap siulitaasuata tullia Naaja Nathanielsen oqarpoq.