Naaja N: Kalaallisuinnaq oqalunneq kajungilersitsinavianngilaq

Naaja Nathanielsenip, IA sinnerlugu ilaasortap nuannaarutigaa inuit pisinnaatitaaffiinut professorip Ole Spiermannip nalunaarusiaani inerniliisoqarmat oqaluttarfimmi oqaatsit sorliit atorneqassanersut Namminersorlutik Oqartussat namminneerlutik aalajangissagaat.

Taamaattumik aamma isumaqarpoq oqaluttarfimminngaanniit aammattaaq qallunaatut oqalunnissaq ammaffigineqartariaqartoq.

Kalaallisuinnarli oqalunnissamik aalajangiisoqassappat uggornassaaq.

- Kalaallit Nunaanni inuiaqatigiit uannut akuersaartuupput ammasuullutillu, isumaqanngilangalu tamanna inunnik kalaallisut oqalunnissamit kajungilersitsinavianngitsoq.

Oqaluttarfiup kalaallisuinnaq oqaluttarfinngortinissaa taassuma maannakkorpiaq piviusorsiortuunnginnerarpaa.

- Taava ukiorpassuarnut siuartariaqassaagut. Ullumikkutut inuiaqatigiinni amerlaqaagut qallunaatut oqaluttuusugut, IA-milu isumaqarpugut kikkut tamarmik kalaallini inuiaqatigiinni sulerusussuseqartut tikilluaqqunartuussasut.

Naaja Nathanielsen tamatumunnga taarsiullugu isumaqarpoq ammasuuneq inussiarnissuserlu kalaallisut ilinniarnissamut periaasiusut pitsaanerpaat.

- Isumaqarpunga inuit pillarneqarunik kajuminnerulernavianngitsut. Isumaqarpunga inuit kalaallisut ilinniarumalertartut ammasuuneq, tapersersorneqarneq qanilaarnerlu misigigaangamikkik. Siunnersuut taamaattoq tunngaviatigut kissaatigineqartunik allanngortitsinavianngilaq, tassalu nunami maani inuit amerlanerusut kalaallisut oqalulernissaannik.

Naaja Nathanielsen isumaqarpoq naalakkersuinermik suliaqartut siunnersuut Siumup saaqqummiussaa sammiinnarnagu oqaatsinik ilikkartitsinissaq meeqqallu atuarfii samminerusariaqaraat.

Siumut, oqaluttarfiup siunissami kalaallisuinnaq oqaluffiunissaanik siunnersuuteqartoq, siunnersuuteqarnermi kisimiilluinnarpoq.