Møller Berthelsenilu GM-imi kuultinnattut
Duathlonimik ippassaq unammisoqarpoq, ujakkaartartut qangatut unammeqqaariarlutik sisoraatinik sukuutserutinik sisoraasersinnarlutik ingerlaarfigisartik uteqqippaat.
Martin Møller Nuummi NSP-meersoq taakkunani ajorsartitassaanngivippoq, minutsillu 46,22-t atorlugit apuuteqqaarami ajugaavoq.
2x7,5 kilometerinut unamminermi Frederik Petersenimit Ilulissani ISP-meersimit minutsinik tallimangajannik siuaqqalluni qimakattarpaa, Kristian Kristoffersen Aasianni ASP-meersoq, normu 2-nngortumit sekundinik 43-nik arriinnerulluni apuuppoq.
Arnat 2x5 kilometerinut unammimmata unammilaavissortoqarpoq. Ukiumikkullu ukiunik 23-nik nikingasoqarnera takujuminaappoq, sisoraatinimmi taarsiisoqartussanngormat 50-inik ukiulik Uiloq Slettemark NSP-meersoq 27-nik ukiulimmit Niviaq C. Berthelsenimit NUP-meersumit siulliulluni apuuppoq.
Aamma atuaruk Martin Møller ujakkaarluni GM-ertoqarnerani unammeqqaarnermi ajugaavoq
Berthelsenili inuusunnerumaarami sukkaneruvoq minutsillu 34,47 atorlugit apuuteqqaartuulluni - Slettemarkimit sekundinik marluinnarnik sukkanerulluni. Arnatsiaq Rosing Sisimiuni SSP-meersoq minutsinik tallimangajannik kingulliulluni apuukkami normu 3-nngorpoq.
Møller sukkaniuunnermi aamma ajorsartitassaanngivippoq
Ujakkaarluni sukkaniuunnerit ataasinngormat ingerlanneqarput. Tassanilu Martin Møller aamma sukkanersaavoq. Erik Amondsen NSP-meersoq normu 2-nngorpoq Kristian Kristoffersenilu ASP-meersoq normu 3-nngorluni.
Arnani Uiloq Slettemark kuultinnappoq, Andrie Sørensen ASP-meersoq sølvinnalluni Arnatsiaq Rosingilu bronzennalluni.
Aamma atuaruk Siorna ujakkaarluni Nunatsinni pissartanngorniunnerit
