Mærsk Nordsømi sillimaniarnikkut ajornartorsiuteqarpoq
Mærsk Nordsøp tuluit imartaata iluani suliffeqarfiuvoq sulinermut avatangiisinik, aamma sillimaniarnikkut malittarisassanik, amerlanerpaanik unioqqutitsisartoq. Kisitsisit tuluit suliffeqarfinnut nakkutilliisoqarfianneersut tamanna takutippaat, 3F nutaarsiassaatimini taama allappoq.
Mærskip suliffeqarfiutaata 2006-imiilli sulinermut avatangiisinut sillimaniarnermullu malittarisassat 92-eriarluni unioqqutissimavai.
Unioqqutitsisuni tulliuvoq Shell, tuluit sulinermi avatangiisinut inatsisaanik 46-riarluni unioqqutitsisimasoq, BP-lu Mexicop Kangerliumanersuani uuliamik ajutoorujussuartoq, 19-riarluni unioqqutitsisimavoq.
Mærsk sillimanissaq pissutigalugu uuliamik qalluinini massakkorluinnaq unitsissagaa tallimariarluni peqquneqartarsimavoq, tamannalu ukioq manna marloriarluni pilluni.
Suliffeqarfissuup 2005-imi atortorissaarutinik suliffimmut naleqqutinngitsunik pisisimanerannik tamanna pissuteqartoq, Mærsk Oil-imit oqaatigineqarpoq.
- Taamanikkulli tuluit imartaani uuliasiorfiit pitsanngorsaavigilerpavut, ajoraluartumilli suli iluarsivinngillat, Mærsk Oil-imi pisortaq Martin Rune Pedersen oqarpoq.
