Mærsk isumannaallisaanermi malittarisassanik unioqqutitsivoq
Qallunaat suliffeqarfiutaat taanna, qilleriviutimini isumannaallisaanermik pitsanngorsaaqqullugu, Sullivinnik Nakkutilliisoqarfimmit naalakkerneqartoq, atuagassiami 3F-imi allaaserineqarpoq.
Umiarsuaq nioqqutissiorfik, Maersk Gryphon, februaarip sisamaanni anorersuallarmat kitsaminit arlalinnit kaanngarpoq. Ajutoorneq gassimik aniatitsinermik kinguneqarsimasoq, Maersk Oilimit ilisimatitsissutigineqarpoq.
Maersk Oil-imut, Nunatsinni uuliamik ujaasinissaminut akuersissummik aamma peqartumut, umiarsuarmi isumannaallisaaneq pitsaanngitsoq 2010-mili ilisimatitsissutigineqarsimagaluarpoq. Tuluit Nunaanni Sullivinnik Nakkutilliisoqarfiup Maerskilllu allaffigeqatigiittarsimaneranni tamanna erserpoq.
Maersk Oilimi pisortaanerup, Martin Rune Pedersenip, nassuiaanera naapertorlugu, Sullivinnik Nakkutilliisoqarfiup oktobarimi mianersoqqusinerata kinguneranik, allamik aaqqiisoqarnissaata tungaanut, umiarsuup lastiani tankip salinnissaanut inerteqquteqartoqalerpoq.
- Allannguutit taakku februaarip sisamaat nallertinnagu suliarineqarsimanngillat, Martin Rune Pedersen atuagassiamut 3F-imut oqarpoq.
Aamma oqarpoq, isumannaallisaanerup ajorpallaarnera februaarimi ajutoornermut pissutaanngitsoq, aamma Sullivinnik Nakkutiliisoqarfimmiit peqqussutit 2010-mi tunniunneqartut malinneqarsimasut.