Mùte Bourup Egede Peter Olsenimut taartissarsiorluni aallartittoq

Ilinniartitaanermut, Kultureqarnermut, Timersornermut Ilageeqarnermullu naalakkersuisoq, Peter Olsen unikkallarnermi tunuariataarmat Inatsisartuni ippassaq oqallinneq pissannganarsivoq.

Peter Olsenip kalaallisut oqaasilinnik tusagassiortussaaleqinermut tunngatillugu suliami iliuuseqarnerata amigarnera pissutigalugu Demokraatineersup Nivi Olsenip tatiginnikkunnaarnermik taasinissaq ataatsimiinnissaq sioqqullugu siunnersuutigaa.

Peter Olsenili isornartorsiuisoqarnerata kingunerisaanik nammineerluni iliuuseqarluni taasisoqannginnerani tunuarniuteqarpoq.

Tamanna Naalakkersuisut siulittaasuata, Múte Bourup Egedep tusaatissatut tiguaa – nutaamillu naalakkersuisussarsiorneq maanna aallartittoq, taanna oqarpoq:

- Naalakkersuisunut ilaasortaq massakkut tunuarpoq, tassanngaanniillu  naalakkersuisoqarfimmut tassunga  inuttaliinissaq, tamakkiisumillu aaqqiinissaq uanga suliassaraara.   

Peter Olsen pisortatigoortumik suli tunuanngilaq, Inatsisartummi tunuarniarluni nalunaarut akueriniarnerlugu akueriniannginnerluguluunniit aalajangiiffigeqqaassavaat.

Múte Bourup Egedep Peter Olsenip tunuarniuteqarnera aamma oqaaseqarfiginianngilaa, uteqqilluguli naalakkersuisoqarfimmut naalakkersuisussarsiornini aallartinnerarpaa:

- Tassa massakkut naalakkersuisoqarfiit agguataarneqarnerinut tunngasunik  aaqqissuussinerit ingerlanneqarput,  uanninngaaniit akisussaaffik taanna naalakkersuisut siulittaasuattut  suliassarigakku, Mùte Bourup Egede KNR-imut oqarpoq.

Tamatuma kingorna Inatsisartut Ilinniartitaanermut, Kultureqarnermut, Timersornermut Ilageeqarnermullu naalakkersuisoq nutaaq akueriniarnerlugu aalajangiiffigissavaat.

- Naatsorsuutigineqassaaq pisoqarumaartoq taakkua tamarmik piareeriarpata, saqqummiunneqarumaarput, Mùte Bourup Egede oqarpoq.