Coronavirusimut akiuussutissamik misileraaneq unitsinneqarallartoq

Coronavirusimut akiuussutissamik misileraanerit naammassiartortut ilaat unitsinneqarpoq. Akiuussutissamik misileraaneq Tuluit Nunaanni inuup misileraanermi peqataasup nassuiaatissaqanngitsumik napparsimalernera pissutaalluni unitsinneqarallarpoq.

Nakorsaasiorfiup AstraZenecap Oxford University suleqatigalugu akiuussutissamik misileraasup oqaaseqartitaa taama ilisimatitsivoq.

- Akiuussutissamik misileraanerit isumannaallisaaneq eqqarsaatigalugu paasissutissat pisarneq malillugu qimerluualaarneqarnerisa kingorna unitsinneqarput, oqaaseqartitaq nutaarsiassaqartitsivimmut Reutersimut ilisimatitsivoq.

AAMMA ATUARUK Donald Trumpip allattoqarfiata qinersinissaq sioqqullugu akiuussutissaqaleratarsinnaaneraraa

Inuup misileraanermi peqataasup akiuussutissamik misileraanermi suna peruluutigineraa sukumiinerusumik saqqummiunneqanngilaq. Misileraanermulli peqataasup peqqissinissaa naatsorsuutigineqartoq, inuk misileraanermut tunngasunik paasissutissaatilik Statnews.com-imut ilisimatitsivoq.

Nakorsaasiorfiit arlallit coronavirusimut akiuussutissamik misileraaleruttorput, taakkunanngalu nakorsaasiorfiit arlallit misileraanerminni immikkoortut pingajuannut killereerput, misileraanerit naammassiartorlutik. AstraZenecap misileraanini taamaalinerani unitsikkallarai, Statnews.com allappoq.

AstraZeneca coronavirusimut akiuussutissamik USA-mi, Tuluit Nunaanni, Brasiliami Sydafrikamilu misileraaleruttorpoq, USA-milu misileraanerit immikkoortut pingajuannut aggustip naalernerani killillutik.