Mubarakip eqqartuunneqarnissaa piumasaraat

Igitsinimi akerliussutsiminnik takutitsisut 10 tuusintilikkaat, Kairomi illoqannginnersami Tahririmi kingumut ullumi katersuuteqqipput. Taakku tamatumuuna piumasaraat, siornatigut kisermaassilluni naalakkersuisuusoq Hosni Mubarak allallu kisermaassillutik naalakkersuisunut attuumassuteqartut peersinneqassasut eqqartuunneqassasullu.
Allattoq Elisa Isaksen
apriilip 08-at 2011 14:48

Mubarak februaarip aqqarnanni uppititaammalli arlaleriarluni akerliussutsimik takutitsisoqartarpoq. Ullumili akerliussutsiminnik takutitsisut siusinnerusumut naleqqiullugit amerlanerupput.

Akerliussutsimik takutitsisut erfalasulisaarlutik katinngatilisaarlutillu neriorsuutigaat, sakkutuut siunnersuisoqatigiit, maanna nunamik aqutsisuusut, iluarsartuusseqqinnissamik neriorsuutimminik eqquutitsinissaannik kimigiiserfigineqassasut.

Mubarak suli Igitsinimiippoq. Taanna nulianilu Suzanne meeqqatillu marluk, Alaa aamma Gamal, nunamut allamut aallaqqusaanngillat pigisaallu nalillit attorneqaqqusaanatik.

Sakkutuut siunnersuisoqatigiit ikaarsaariarnermi siunnersuisartuusut Igitsinimi iluarsartuusseqqinnissamik qinersisoqarnissaanillu neriorsuuteqareerput, akerliussutsiminnilli takutitsisut sakkutuut siuttui neriorsuutiminnik eqquutitsiniarnerat nalorninartoqartippaat. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq