MT Højgaard Pituffimmi suliassinneqartoq
USA-mi illersornissaqarfiup ilaa US Army Corps of Engineers isumaqatigiissusiorfigineqarsimavoq, illuliassallu toqqavilersorneqarneranit naammassineqarnissaa MT Højgaardip isumagissavaa. MT Højgaard tusagasiuutinut taama ilaatigut nalunaaruteqarpoq.
Illuliortoqarnissaanut atatillugu piareersaanerit aqutsinerillu ilaatigut artornartoqarsinnaassasut MT Højgaardip ilisimatitsissutigaa:
- Assersuutigalugu umiarsuit pajuttaatit ukiumut marloriaannarlutik tikittarput, juulimi septembarimilu, illuliornermi atortussat naammattut tikisinneqarnissaat ajornakusoorsinnaassalluni. Taamaammat sukumiisumik pilersaarusiortoqartariaqarpoq, Sune Bastrup, MT Højgaardimi suliniutinik ataqatigiissaarisoq oqarpoq.
Aamma atuaruk Greenland Contractors Pituffik pillugu nutaamik isumaqatigiissusiortoq
Aamma atuaruk MT Højgaardip Pituffik pillugu suliaq eqqartuussivimmut suliassanngortikkaa
Nuna qeriuaannartoq sanaartorfigineqartussaavoq, tamannalu pissutaalluni assersuutigalugu uumassussilinneersunit soorlu qisummit pisunik sanaartortoqarsinnaanani.
Illuliornermilu atortussat annertunersaat taamaammat savimiusariaqassapput, soorlu aamma betonimit pisut piareeqqasut ikkussortariaannaat atorneqartariaqassasut, piffissarmi sanaartorfiusinnaasoq sivikitsuinnaavoq.
Piginneqatigiit Greenland Contractors, aallarniisuminnut, tassa MT Højgaardimut suleqataasut, illuliornermi suleqatigineqassapput. Greenland Contractors Pituffimmi ingerlatsinermik ataqatigiissaarisuuvoq, 67 procentialu MT Højgaardimit pigineqarluni.