MSC-mut piumasaqaatit sukakkiartorput
Kalaallit Nunaat nunani kisiartaanngilaq aalisakkanik nioqquteqarnermi MSC-mik meqqilinnik nioqquteqalernissamik piumaffigineqartoq. Savalimmiormiut ammassarsuarnut MSC-mut meqqimik pissarsipput ammassassuillu arlaat makrel akueritinniarlugu suliniuteqarlutik.
Qaammatit qulingiluat atorlugit savalimmiormiut ammassassuarnut MSC-mut uppernarsaat pissarsiariarsimavaat piffissallu taassuma ingerlanerinnaani piumasaqaatit sukakkiartornerat malugisimallugu.
- Siullermik ilisimatinneqarput aki pitsaasoq anguniarutsigu MSC-mut uppernarsaat pissarsiarisariaqaripput. Kingornalu piumasaqaatit sukanneqarput Danmarkimi aalisakkanik niuerfinnut tunisaqassagutta meqqi taanna pisariaqartoq, taama KNR-imut oqarpoq Savalimmiuni aalisartut kattuffianni FPO-mi siulittaasoq Jógvan Jespersen.
Taassuma ilaasortai aalisakkanik ikerinnarsiortunik aalisartuupput ammassarsuarnik taakkulu arlaanni makrelinik.
Europa-mi atuisartut annertunerujartortumik piumasaraat uppernarsarneqarsinnaassasoq aalisakkat pisiamik nungusaataanngitsumik pisaasimanerat.
Aalisakkanik niuertut piumasaraat MSC-mut uppernarsaatip atsiorneqarsimasup assiga peqqaarlugu pisinissamut isumaqatigiissut atsiortarniarlugu. Uppernarsarneqarsinnaassaaq aalisariut sorleq pisaqartuusimanersoq aalisakkallu pisiniarfimmi nillataartitsivimmut aqqutaa tamarmi takuneqarsinnaassalluni.
- Danmarkimi aalisakkanik niuertut ilaat ammassassuarnik pisisimavoq ilimagalugu MSC-mut akuersissut inissereersimasoq. Kisianni ammassassuit tunisinnaasimanngilai MSC-mut uppernarsaat atsiorneqarsimasoq pigineqalinngippat.
Taamaattumik Savalimmiormiut erseqqissumi oqariartuutigaat:
- Uani aalisakkat akii kisimik pineqanngillat aalisakkalli tunisinnaanissaat maanna pineqalerpoq, taama Jógvan Jespersen oqarpoq.