Ilisimatusartut: Umimmaat qangaaniilli nungoreersimasussaagaluarput
Taamaakkaluartorli umimmaat uumalluartorujussuupput tamannalu ilisimatuut paasiuminaatsikkaat, Videnskab.dk allappoq.
Ilisimatuut kalaallillu piniartut Nunatsinni Canadamilu umimmaat amiinik, nukiinik ilormiuinillu ukiut ingerlaneranni katersipput.
Ilisimatuut uumasut DNA-vat misissuiffigaat. Matumanilu umimmaat ikinnerusunik assigiinngitsunik geneqartut paasillugu.
Tamanna uumasunut amerlanertigut ajornartorsiutaasarpoq. Genimmi assigiinngitsut ikinnerunerat pissutigalugu uumasut napparsimalernissaat ajornartorsiuteqalernissaallu aarlerinarnerusarpoq.
AAMMA ATUARUK Silap pissusiata allanngoriartornera umimmaat akornutigigaat
Tamanna soorlu pandani takussaavoq. Umimmalli pappilissatigut uumasunit allanit nungoratarsinnaasunit soorlu pandamit, tiigerimit gorillamit qaqqarmiumit ajornerusumik inissisimagaluarluni ajunngitsorujussuuvoq.
Nunatsinni umimmaat nunatta kitaani nutaamik umimmaqarfiliornermut allaat atorneqarput, amerliartortitat 27-usut ukiut 50-iinnaat ingerlanerini 20.000-inngortinneqarlutik.
Umimmaat taama genikitsigalutik sooq ingerlalluarnersut ilisimatuut suli naluaat. Imaassinnaavoq Issittumi nappaatit ikinnerusut, imaluunniit genit ajortut Canadamit Nunatsinnut ingerlaarneranni immikkoortinneqartut.
Ilisimatuulli umimmaat geniinik misissuinertik ingerlatiinnarlugu paasissutissarsiorniarsariniarput.
Ilisimatuuttaaq Nunatsinni Canadamilu umimmaat allarsuartut nannutullu assigiinngitsigisut paasivaat.
