Mobilepay nunatsinni atorneqarsinnaalersoq
Nunatsinni Mobilepay aqqutigalugu ullumimit akiliisoqarsinnaalerpoq.
Grønlandsbanken tusagassiuutinut nalunaarummi allappoq.
Taamaalilluni bankikkut nuussinngikkaluarluni aningaasanillu tiguseqqaanngikkaluarluni app-i aqqutigalugu aningaasanik nassitsisoqarsinnaalerpoq.
Taamaaliorniaruilli Mobilepayeqaqqaassaatit.
Danskilli kalaallillu normuisa ataqatigiissilerniarnerat unammillernarsimavoq. Sianerniarluni aallarniutitut normut normullu amerlassusaat assigiinngissimapput.
- Nunatsinni oqarasuaativit normua danskit normuanut atassusissavat.
- Tusass-imit atuisuuffeqaruit tusass.gl aqqutigalugu akeqanngitsumik taamaaliorsinnaavutit.
- Tamatuma kingorna app-i Mobilepay aassavat danskillu normuanut nutaamut normutaarisannut, kontovit normuanut aningaasanik tigusisinnaanissannut, akiliissutivit normuanut CPR-normunnut imaluunniit NemID allallugit atassusissavat.
- Akiliut atorlugu Mobilepayitaartoqarsinnaanngilaq.
Grønlandsbankenip Tele-Postillu tamanna maanna aaqqiissuteqarfigaat.
- MobilePay nunatsinni saqqummersinneqarnerani peqataanerput nuannaarutigaarput. Ilimagaaralu atorneqarnera siuaruartipallassasoq. Ajornanngitsumik, eqaatsumillu akiliisinnaanerit inuiaqatigiinnut iluaqutaassapput, GrønlandsBANKEN-imi pisortaq, Martin Kviesgaard oqarpoq.Unammillernartoq taanna Grønlandsbankenip Tele-Postillu maanna aaqqiissuteqarfigaat.
Aningaasanik tigusinerit ikinnerusut
Tele-Postip danskit normuisa kalaallillu Tusass-imit normuinut atassuserniarnissaat sulissutigisimavaa.
- Nuannaarutigaarput pingaarutilimmik unammillernartoq aaqqiiffigeqataasinnaagatsigu, nunatsinnilu MobilePay-imik atuisunngorsinnaasunut periarfissillugit. Tusass.gl-imi aaqqiissuterput atoruminarpoq, akeqarnanilu. MobilePay-imi atuisut ullumimiit pilersinneqareersinnaapput, Tele-Postimi pisortaaneq, Kristian Reinert Davidsen oqarpoq.
Nunatsinni Mobilepayimik atuisut Danmarkimi Mobilepay atorlugu akiliisinnaapput, Danmarkimilu atuisut nunatsinni Mobilepayimik aamma akiliisinnaallutik.
- Kalaallit Nunaanni MobilePay saqqummerneqarnerani neriuutigaarput suliffeqarfiit atuisullu Danmark-imi Kalaallit Nunaannilu suleqatigiinnerat qanillinerussasoq. Naatsorsuutigaarpullu MobilePay atornera ulluinnarni oqilisaataassasoq, inuiaqatigiinnimi aningaasat aggortitat pisariaqartinneri annikilliartormata, MobilePay-imi pisortaaneq Claus Bunkenborg oqarpoq.