Mittarfiup nutaap eqqaani taxanut akiliut naammagittaalliutigineqartoq

”Aalajangiinersi kanngunaqaaq”

”Bussertalissaanga”

”Mittarfik nunarsuarmi akisunerpaalissaaq”

Kalaallit Airportsip Nuummi mittarfittaamut atatillugu taxanut akitsuummik - imaluunniit taxanut akiliummik atuutsitsilernissamik aalajangiinera inoqutinut attaveqaatitigut naammagittaalliutigineqarpoq.

Nutaarsiassaq annertuumik oqallitsitsilerpoq, Facebookimillu atuisorpassuit taxarnerminni akiliinerusalernissartik ilorrisimaarutiginngilluinnarpaat.

Taxartartup. Paul Djurhuusip Kalaallit Airportsip taxanut akiliuteqartitsilernissamik aalajangernera aamma isumaqatiginngilaa.

- Isumaqatigivallaanngilara taama oqarsinnaavunga, taama oqarluarsinnaavunga, taanna oqarpoq.

Paul Djurhuusip ilaasortumi mittarfimmut mittarfimmiilluunniit ilaanerminnut akiliinerusalissanerat uggoraa. Assi © : Johansinnguaq Olsen / KNR

Taanna ullormut tallimariarluni mittarfimmiit mittarfimmullu ingerlassisarpoq, taassumalu ilaasussani pitsaanerusumik akiliuteqarsinnaatikkusukkaluarpai.

- Tassami taanna akitsuut suliluunniit mittarfimmut isernani aallartussaq aallerfigereeramikku, taanna oqarpoq.

Akiliut nutaaq pissutigalugu taxaatileqatigiiffiit Kalaallit Airportsimut taxat aallariartortarfimmukaassineri tamatigut 10 koruunimik saniatigut akiliisassapput. Nuuk Taxallu akiliut taanna atuisartuminnut marloriaatinngortinniarlugu aalajangerpaat, taxaatileqatigiiffiimmi akiliummik nutaamik isumaginninnissaminnut aamma namminneq saniatigut aningaasartuuteqartalissapput.

Tamanna Nuuk Taxami pisortap, Janus Eigaardip KNR-imut uppernarsarpaa. Taxartartullu, Paul Djurhuusip taperserpaa.

- Taakku aningaasat iseraluartut, uanga amerlanersai pissarsiarinianngilakka, pissutigalugu systemerput nutartigassaavoq taakku IT-mut tunngasut akisoorujussuupput, taanna oqarpoq.

SIK: Akitsuusiinissamut tunngavissaqanngilaq

Akiliut nutaaq nunatsinni sulisartut kattuffiannit, SIK-mit aamma ilorrisimaarutigineqanngilaq.

Taxat taxartullu mittarfiup illorsuisa silataaniinnerannut akileeqqusinissamut tunngavissaqanngitsoq, siulittaasoq, Jess G. Berthelsen isumaqarpoq.

- Uffalu maani nunami, nuna pisiarineqarsinnaanngitsoq, nunaminertaq. Assigiinnarpaa uagut eqqatsinni akiliisitsisalerutta. Taamaattoqarsinnaanngilaq, pinnguartoqarpoq isumaga naapertorlugu, taanna oqarpoq.

SIK-p siulittaasuata taxanut akiliut nutaaq akerlerilluinnarpaa. Assi © : KNR

KAIR: Taxanut akiliuteqartitsineq nalinginnaalluinnarpoq

Kalaallit Airportsip oqarnera naapertorlugu mittarfik nutaaq – nunallu tamalaat akornanni mittarfeqalernissaat pissutigalugit ilaasartussat amerliartornissaata kingunerisaanik taxanut nalinginnaasumik akiliuteqartitsisartoqalissaaq.

Kalaallit Airportsip attaveqaqatigiinnermut pisortaata, Mikkel Bjarnø Lundip taxanut aqqut nutaaq malitsigisaanillu akiliut mittarfimmut mittarfimmiillu taxarniartunut ajornaannerulersitsissasoq tusagassiuutinut nalunaarummi nassuiaatigaa.

- Ukiuni aggersuni Nuummut aamma Nuummiit timmisartumik angallanneq annertuumik annertusiartussasoq naatsorsuutigaarput. Taamaattumik mittarfimmi siunissamut isumannaarinissaq aammalu taxat aqqutissaannik pilersitsinikkut taxaatileqatigiiffinnut sullissinerup annertusitinnissaa, aalajangiuppagut, taanna oqarpoq, nangillunilu:

- Sanaartorneq aserfallatsaaliuinerlu aningaasalersorniarlugu taxat aqqutissaannik atuinermut akiliummik atuutsitsilernissaq aalajangiupparput. Soorlu nunarsuaq tamakkerlugu mittarfippassuarni allani aamma taamaalluinnartoq.

Tamatuma saniatigut taxanut akiliummik atuutsitsilernissamut atatillugu malittarisassat malinneqartut attaveqaqatigiinnermut pisortap erseqqissaatigaa.

- Ilanngullugu oqaatigisinnaavara akiliummik atuutsitsilernissamut akiliisitsisalernissamullu akuersissutinik pisariaqartunik KAIR-imi piniareeratta, taanna oqarpoq.

Nuummi nunanit tamalaaneersunut mittarfissaq pilersaarut malillugu novembarip 28-ani atulersinneqassaaq.