Nuummi mittarfik nutaaq taxanut – ilinnullu akisunerulissasoq

Nuummi taxanut ilaallutik mittarfiliaatsinniaruit taama taxanut akiliutissat siusinnerusumit allaanerussasoq piareersimaffigissavat.

Taxammi mittarfiup eqqaanukartut tamarmik maajip aallaqqaataanit taxanut akitsuummut 10 koruunimik akiliisalissapput.

Sermitisiaq.AG taama allaaserisaqarpoq, Kalaallit Airportsillu tamanna KNR-imut allakkatigut uppernarsarpaa.

Taxat taxanut aqqut atortalissavaat, taamaalillutillu nummerpladii scannerneqartassallutik, taxaatileqatigiiffillu tamatuma kingorna akitsuummut akileeqquneqartassalluni.

- Kiffartuussinernerup annertusinissaa mittarfimmillu niuertunut atuisunullu taxanik sukkasuumik pissarsisoqarsinnaanissaa pissutigalugu taxanut immikkut ingerlaarfissaliortoqarpoq, tamannalu taxaatileqatigiiffiit ilaasussaminnukarnissaminnut iluaqutigisussaassallugulu ineriartortitsivigisinnaavaat, taakku allapput.

Tassa tamanna taxanut mittarfimmut mittarfimmiillu ingerlasussanik ingerlatsinissaannut ajornaannerulersitsissaaq.

- Taxatileqatigiiffinnut mittarfissami pissutsit nutaatuagutsinnut – sanaartornermi aamma ingerlatsinermi aserfallatsaaliunermullu atatillugu aningaasartuuterpaaloqarneranut atassuteqarpoq. Tamanna mittarfimmik atuisussanut kiffartuussilluarnissamik qulakkeeriniarneq pillugu pilersinneqarpoq.

- Tamatuma saniatigut mittarfiup nutaap ineriartortinnissaanik taxartartullu isaatitsinissaannik qulakkeerineruvoq, taamaammallu taakku aningaasartuutinut ingerlaavartumik tapiissuteqarnissaat aamma naapertuuppoq, Kalaallit Airports allappoq.

Nuuk Taxap akitsuut marloriaatinngortikkaa

Naallu Kalaallit Airportsimit taxanut akitsuut nutaaq 10 koruuneqaraluartoq taxartartunut marloriaammik tassa 20 koruunimik naleqassaaq.

Nuuk Taxammi akitsuut marloriaatinngortinniarlugu aalajangerpaa, akitsuutimmi nutaap isumaginissaa pissutigalugu taxaatileqatigiiffiup naatsorsuuserissutaata ineriartortitsinneqarnissaa saniatigut aamma aningaasartuuteqarfiussammat.

Nuuk Taxa Sermitsiaq.AG-mut paasissutissiivoq.

Nuuk Taxalli pisortaata, Janus Eigaardip taxanut ilaanermut aqqutaa – naak nutaamik akitsuuserneqaraluartoq tamanna atuisartunut akitsornavianngitsoq erseqqissaatigaa.

- Angalasut taama akiliisinneqarnissaannik piumasaqarnissarput nuannarinngilarput, kisiannili ataatsimik nuannaarutissaqarpugut. Naatsorsuutigaarput timmisartoqarfiup nutaap inissisimaffia pissutigalugu mittarfimmit illoqarfimmut taxamik ingerlanneqarneq sivikinnerulerumaartoq, taamaattumik maannakkutut akigitinneqartoq assigissavaa, immaqalu 1-2 koruuninik akikinnerussalluni, naak akitsuut nutaaq 20 koruuni ilaagaluartoq, Nuuk Taxami pisortaq Janus Eigaard Sermitsiaq.AG-mut oqarpoq.

Nuuk Taxa qaammammut 6.000-it missaannik timmisartummukaassisartoq taassuma ilanngullugu paasissutissiissutigaa.

Ilaasussat amerlanerusut – sammiveqannginnerusorlu?

Mittarfik nutaaq – naak nutaamik akitsuuteqarfiuleraluartoq illoqarfiup taxaatileqatigiiffiinut iluaqutaassasoq naatsorsuutigaa.

Mittarfimmimmi atuisut amerlanerulerunik tamanna taxanik pisariaqartitsisussat amerlanerulernissaannik aamma isumaqarpoq, Kalaallit Airports allappoq.

- Taxaateqartut mittarfimmit atuisoqarnerulernikkut ineriartulernissaat naatsorsuutigaarput. Tamanna akitsuutip allannguiffiginavianngilaa.

Akitsuulli taxanut ilaasut sumut niuneqarusunneranut immaqa allannguisinnaavoq.

Ilaasussat ilaat 20 koruunimik sipaarniarlutik mittarfiup eqqaata avataanut niuneqarusussinnaanissaat takorlooruminaatsuunngilaq.

Kalaallit Airportsilli pissutsit tamakku qanoq aaqqiiviginiarnerlugit ersarissumik akissutissaqartinngilaa.

Assersuutigalugu taxanut ilaasut mittarfiup eqqanut pinnginnerminni saniatigut akiliiniarnatik niujaarniartassappata tamatuma angallannermut ajornartorsiutaalinnginnissaa qanoq qulakkeerniarpisiuk?

- Taxartartut pissutsinik nutaanik ineriartortitsinissamullu periarfissamik – mittarfimmit aamma tunniunneqartumik atuilluarnissaat naatsorsuutigaarput.