Mittarfiit takissusissaat Inatsisartut aalajangissavaat
Ilulissat Nuullu mittarfiisa tallineqarnissai ukioq manna oqallisigineqartorujussuupput.
Mittarfiit 1199 meterinut tallineqarnissai Naalakkersuisut siunnerfigigaluaraat, kommunit takinerusunik mittarfeqarusupput.
Kommuniniillu piumasarineqartut Inatsisartunit akuerineqassappata, Naalakkersuisut akiuunnavianngillat.
- Inatsisartut kisiivimmik taanna aalajangiagassarivaat, attaveqarnermut naalakkersuisoq, Knud Kristiansen KNR-imut oqarpoq.
Inuussutissarsiornermut siuariartortitsisoq
Naalakkersuisullu siunnerfianniit Inatsisartut akerlianik aalajangissappata, mittarfiillu takinerulersinneqassappata, assigiinngitsunik tamanna periarfissiissasoq, Knud Kristiansenip erseqqissaatigaa.
- 1799 meterit eqqarsaatigigutsigit Islandimut toqqaannartumik angalasinnaalissaagut, Knud Kristiansen oqarpoq.
Mittarfiit takinerusut timmisartunik anginernik miffigineqarsinnaassammata, inuussutissarsiornermut takornariaqarnermullu iluaqutaalluarsinnaassasoq, Knud Kristiansen isumaqarpoq.
Aamma atuaruk Asiip Kunuullu mittarfik tallerusuppaat
Aamma atuaruk Air Iceland: Qaqortumi mittarfiliortoqarnissaq pisariaqartinneqanngilaq
Taamaakkaluartoq Naalakkersuisut Ilulissani Nuummilu mittarfiit 1199 meterinut tallineqarnissaat siunnerfigaat. Naalakkersuisut taamaalillutik ineriartorneq aqussinnaanerussammassuk.
- Naalakkersuisuninngaanniit aqutamik ineriartorneq oqariartuutiginiarparput. Tassungalu atavoq, minnerpaamik 1199 meterinik tallineqassasut qinnutigalugu oqariartuutigalugu, naalakkersuisoq oqarpoq.
Inuussutissarsiornerup, takornariaqarnerullu ineriartornerat mittarfinnilu illuliat ineriartornerat imminnut naapertuussasut Naalakkersuisut piumasarigaat, Knud Kristiansen oqarpoq.
Kommuninit piumasarineqartut
Nuummi mittarfiup 1799 meterinut tallineqarnissaa, Kommuneqarfik Sermersuumit piumasarineqarpoq. Aamma Qaasuitsup Kommunianit 3000 meterit ataatilaarlugu takissusilimmik mittarfeqalernissartik kissaatigaat.
Inatsisartut piumasarineqartunut qanoq isumaqarnersut paasinarsiumaarpoq.
Aamma atuaruk Qaasuitsup kisimiiilluni suliniutaa nunatta sinneranut sunniuteqarsinnaasoq
Kommunilli erseqqissumik piumasaqarnerat Knud Kristiansenip nuannaarutigaa.
- Qujanartumik, kommunit qanoq eqqarsarnerlutik siulianiilli isummat ersarissumik anninnikuuaat. Taanna qujassutigisorujussuuara aamma iluaqutigissavarput. Pingaartumik aamma Inatsisartut aalajangiiniarnerminni paasissutissat pisariaqartippaat, Knud Kristainsen oqarpoq.
Mittarfiit pillugit Naalakkersuisut pilersaarutaat novembarip aqqaneq aappaanni Inatsisartuni siullermeerneqassaaq.
