Lars-Emil Johansen: Mittarfiit pingasuusut namminiilivinnissamut qanillattorteqqissavaatigut
Politikeri Siumumeersoq soraarneq Lars-Emil Johansen taama oqarpoq. Taanna politikkimik suliaqarnermini nunatta nammineernerulernissaa sulissutigaa, 1979-imi namminersornerulernermit ukiullu 30-t qaangiummata namminersornerup eqqunneqarneranut.
Nammineernerulernissamillu kissaateqarnermut tunngatillugu Danmarkimut isumaqatigiissuteqarnermi aqqutissamik uniuisoqarsorinngilaa.
- Naagga, taama oqartoqarsinnaasorinngilara. Soorunami uanga kissaatiginerusimagaluarpara Danmark aningaasaleeqataatinnagu aningaasanik allanik aaqqiisoqarsinnaasimassasoq, Lars-Emil Johansen, apriilimi qinersineq tikillugu Inatsisartuni siulittaasoq taama oqarpoq.
Takornariaqarnerup ineriartornissaa pingaarnerusoq
Lars-Emil Johansenili naapertorlugu nunatta nutaanik mittarfiliortiterneratigut takornariaqarnerup ineriartortinnissaa, taamatullu nunatta aningaasarsiornikkut siumut aallarnissaa pingaarneruvoq.
- Mittarfiit pingasuusut namminiilivinnissamut qanillattorteqqissavaatigut, Lars-Emil Johansen oqarpoq.
AAMMA ATUARUK Mittarfiit pillugit inatsisissaq sisamanngornermi taasissutigineqassaaq
Oqaluttuarisaanermik ilisimatooq aviisimilu Politikenimi aaqqissuisuuneq naapertorlugu Danmarkimik suleqateqarnerulerneq nunatta nammineernerulernissaanut akornutaassanngilaq.
- Nammineernerulernissamut pissutsillu namminermut tunngasut oqartussaaffiginerulernissaannut aqqutissaq tassaavoq nunat Kalaallit Nunaata oqaluttuarisaanerup ingerlanerani qanittumik suleqatigisimasaata, sulilu suleqatigisaata, qaninnerusumik atassuteqarfiginissaat, Kalaallit Nunaannullu tunngatillugu atassuteqarfigissaq tassaalluinnarpoq Danmark, Bo Lidegaard oqarpoq.
Lars-Emil Johansenilu naapertorlugu pingaarnerpaavoq Danmarkip Kalaallit Nunaata mittarfinnik piginneqatigiinnissamut akisussaaffik pitsaasumik atussagaat.
- Danmark naalagaaniartussanngorlugu inissinnagu, kisiannili ullutsinnut naleqquttumik qanganisarpasittuunngitsumik suletigiinneqassooq naalagaaniunneqarani suleqatigiittoqarlunili, Lars-Emil Johansen oqarpoq.
AAMMA ATUARUK Itigartitsisinnaatitaaneq aktianik piginneqatigiiffinni nalinginnaasuuvoq
Politikeriusimasoq Inuit Ataqatigiinneersoq Kuupik Kleist, namminersorneq pillugu inatsisip 2009-mi atuutilernerani naalakkersuisunut siulittaasuusoq, KNR-ip oqaaseqartinniaraluarpaa, taannali oqaaseqarusunngikkallarpoq.
