Mittarfiit itersanitsitertarnerat ajornartorsiutaavoq
Silap ukiuni kingullerni kiatsikkaluttuinnarnera pissutaalluni nuna qeriuaannartoq aakkiartuinnalersimavoq, mittarfiit arlallit itersanitsitersimallutik. Kangerlussuarmi mittarfiup ilaa matuneqartariaqarsimasoq, Mittarfeqarfiit pilersaarusiornermut pisortaat Henning Nørregaard Sørensen, Jyllands-Postenimut ilaatigut oqarpoq.
- Timmisartut tamaani uninngasinnaatitaaanngillat. Timmisartut itersat tamakku aqqusaaraangamikkit tammikassalertarput, Henning Nørregaard Sørensen, Jyllands-Postenimut oqarpoq, Kangerlussuulli mittarfittaani kisimi ajornartorsiortoqanngitsoq, mittarfiulli avataani aqqusinerni aamma ajornartorsiuteqartoqartoq, Henning Nørregaard Sørensenip ilimagaa.
Aqqusernit ilaatigut maniillisimapput, illullu arlallit ilaannakortumik nakkaassimanerannik kinguneqarsimalluni.
Nunap qeriuaannartup aakkiartornera Ilulissat mittarfianni aamma malugineqarpoq. Tamaani mittarfiup ilaa aamma matuneqartariaqarsimavoq, akisoqisunillu aaqqiiniartoqarsimalluni. Assaasoqartariaqarsimavoq, itersallu ujaqqanik immerlugit isumannarunnaarsinniarneqarsimallutik.
Kangerlussuarmi Ilulissanilu mittarfiit kisimik ajornartorsiorfiunngillat. Qaarsuarsunni aamma ajornartorsiortoqarpoq. Mittarfik ukiut 14-it matuma siornatigut sananeqarmat taamanikkut isumaqartoqarsimagaluarpoq nuna qeriuaannartoq aakkiartornavianngitsoq, maannali tassa aamma aakkiartulersimalluni.
Ajornartorsiutit aaqqiiviginiarneqarnerini iliuutsit naliginnaanngitsut oqartussanit ilaatigut atorniarneqalersaarput, mittarfiit qaqortumik qalipanneqarnissaat ilaatigut eqqarsaatersuutigineqarluni. Mittarfiit qaqortumik qalipanneqarnerisigut seqernup qinngorneri avataarsuanut uterteqqinneqarsinnaanissaat anguniarneqarpoq.
Mittarfiilli ilaatigut itersanitsitersimanerat isumannaallisaaniarnermut ajornartorsiutaanngitsoq, Mittarffeqarfiit erseqqissaatigaat, mittarfiit ullut tamaasa misissoqqissaarneqartarmata.
Nunap qeriuaannartup aakkiartornera pissutaalluni Ilulissani Qaarsunilu aamma ajornartorsiortoqartoq, Jyllands-Postenip allaaseraa. Mittarfiit katillugit 13-it Mittarfeqarfinnit ingerlanneqarput.
