Mittarfeqarfinni sulisut appussaaqqasut
Avanaanni juullisioriarlutik angalasut ulluni arlalinni kinguaattooqqareerlutik maanna apuuffissaminnut apuutillattaalerput, sumiiffinnili tamani taamaanngilaq.
Allattoq Niels Krogh Søndergaard
Angalasut 21-t Air Greenlandimit angallatinik attartorluni Ilulissanit Qeqertamut Saqqamullu angallanneqartut, angallammik allamik angallanneqarlutik orninniakkaminnut apuutereersimalerput. Timmisartuutileqatigiiffimmit Christian Kjeldsen KNR-imut taama ilisimatitsivoq.
Aamma atuaruk Angallat juullisiorianik 21-nik ilaasulik ikuallaleraluartoq
- Ilaasut tamarmik juullertinnagu apuunneqarsinnaanissaat maanna ilimagaarput. Ilaasussalli pingasut pakatsisittariaqarsimavavut, taakkunanngalu marluk orninniakkaminnut namminneerlutik angallatissarsisinnaasimapput, taanna oqarpoq.
Ilaasuni Air Greenlandimit angallanneqartuni ilaasut 21-t pineqartut iluatsitsinerlungaatsiarput. Taakkumi teknikkikkut ajornartorsiuteqarneq patsisigalugu Ilulissanit angallammik angallanneqarnissaat neqeroorutigineqartariaqarsimavoq, angallalli attartorneqartoq ikuallaleraluarluni.
Uummannap eqqaani angalasussatut utaqqisut tamarmik angallanneqareersimalerput. Aasianni angalanissaminnut utaqqisut 50-it 100-llu akornanniittut juullisioriarfissaminnut kiisami ingerlateqqinneqartut Christian Kjeldsenip oqaatigaa. Tunumi Nerlerit Inaanni mittarfimmi sulisut appussaangajassimapput. Taamaattumik Tunumi angalasussat qulit maanna kinguaattooqqapput.