Nuummi kinguaattoortoqarsinnaanissaa Mittarfeqarfiit aarlerisaarutigaat

Timmisartuussinerit arlallit tamatuma kingunerisaanik taamatinneqarsinnaapput, timmisartullu utersinnaallutik siallu isikkivilunnera putsullu pukkippallaarnerat pissutigalugu timmisartorneq sivisunerusinnaalluni.

Sila isikkivilutsillugu putsullu pukkitsillugit timmisartut Kitsissut qulaallugit sumiissusersiutip sermisimanera pissutaalluni mikkiartortariaqartarput, timmisartut uuttuutaat atorneqarsinnaatinnagit mikkiartornermi paasissutissanik tigooqqaaneq Kitsissuni antenni aqqutigalugu pisariaqartarmat.

Sermeq teknikkikkut atortunut akornutaasqo Quassussuup saavani tatsimeersuusoq nalunaarutigineqarpoq, tatsip imaa sermip iluatigoorluni mittarfiup tungaanut kuuttarluni. Imeq tassani qerisarpoq, tamatumalu kingunerisaanik sermeq alliartortarluni.

Sermeq 25.000 kubikmeterinik annertussususeqartoq Mittarffeqarfiit nalilerpaat:

- Sermeq localizerip maligaasaanut akornusersuisoq allisimavoq issutsissimallunilu. Sumiiffinni amerlasuuni sermeq 2 meterit tikillugit issussuseqarpoq. Erngup sermip iluatigut kuunnerani qerisarneranilu sermeq suli issutsikkiartortarpoq. Sumiiffiup taassuma sermernera siornatigut takusaraluarparput, kisiannili sermip aatsaat taama annertutigisumik issutsikkiartuinnarnera takuarput, Nuummi mittarfiup pisortaa Jimmy Gudmandsen nassuiaavoq.

Quassussuup tasianiit erngup kuuffiata aasamut allanngortinneqarnissaa pillugu Mittarfeqarfiit kommuni oqaloqatigaat, erngup maanna kuuffia antennit saavanni sermimik ajoraluartumik annertusiartortitsisarmat.