Mittarfeqarfiit: Qangali pilersaarutigaarput
Narsarsuaq ulluni makkunani pisoqarfioqaaq. Mittarfeqarfimmi sulisut sapaatit-akunnerata naanerani kingulerrmi akerliussutsimik takutitsipput. Allagartarsualisaarput allassimasunik "Danmarkimut angerlarniarit " aamma "Aasiannut angerlarniarit." Allagartarsuit akunnittarfiup errorsisarfiani ukiuni 30-ni kingullerni aqutsisuusumut akunnittarfiulllu pisortaanut qanittukkut atorfinittumut sammipput.
Narsarsuarmi sipaarniuteqarujussuartoqartussaanngikkaluarpat, allagartarsuit allanneqarsimanavianngikkaluartut, tusarfigut Radioaviisimut oqaluttuarput.
Kujataani mittarfissuaq Kangerlussuartulli maannamut sipaarfigineqarujussuanngilaq. Kisianni sulisut ullormut pingasoriarlutik akeqanngitsumik nerisarnerat septembarip aallaqqaataanit taamaatissaaq. Taava aamma sulisut ikilisaqqinneqassapput. Mittarfeqarfiup Narsarsuarmi sulisui ukiut kingulliit ingerlarneranni 160-iusimagaluarsinnarlutik 100-nngorsimasut, tusarfipput oqaluttarpoq.
Sipaarniarneq kamatsitsivoq akunnittarfiullu siuttuisa aqutseriaasiat sukannerneragaasoq naammagittaalliuutigineqalerpoq. Akerliussutsimillu takutitsisoqarneranit ullualuinnaat qaangiuttut, akerliuffigineqartut aappaat, akunnittarfiup pisortaa, Charlotte Hellegård, Mittarfeqarfinnit soraarsitaavoq. Mittarfeqarfiit attaveqarnermut pisortaat, Hans Henrik Lichtenberg, oqarpoq, soraarsitsineq ingerlatsinermuinnaq tunngaassuteqartoq.
- Matuminnga pilersaarusiorneq ukiup affaani kingullermi aallupparput, pilersaarusiornitsinnilu malunnarsisimavoq, Narsarsuarmik aqutsinikkut unammilligasaqartugut, tassa sulisunut ataasiakkaanut tunngasunik uanili oqaluusererusunngusannik. Kisianni tassa Narsarsuarmi aaqqiagiinngittoqartarsimavoq, attaveqarnermut pisortaq oqarpoq.
Taannali aperaarput akunnittarfiup pisortaanik soraarsitsineq Narsarsuarmiut tassunga akerliuneranik peqquteqannginnersoq.
- Pisut taakkua imminnut toqqaannartumik atanngillat, Hans Henrik Lictenberg akivoq.
Hotel Narsarsuup pisortaa soraarsitaatinnani amigartoorutinik sinneqartoorutinngortitsinissamut ukiumik ataasiinnarmik periarfissinneqarpoq. Taanna aappariinnit Ernst aamma Rina Lundimit, aappaa Permagreenimi aappaalu Nukissiorfinni maannamut sulisunit taarserneqarput. Errorsisarfiup ukiuni kingullerni ningiua soraarsitaanngilaq.
Siunissarli aningaasaqarnikkut isumalluarnarpallaanngilaq. Tassami akunnittarfik imminut akilersinnaasumik ingerlanniarneqalerpoq.
- Ingerlatsinissamut isumaqatigiissusioratta, aappariit kujataaneersut ingerlatsisussanngortillugit, taakkualu ingerlatsineq siunissami akisussaaffigissavaat, Mittarfeqarfinneersoq Hans Henrik Lichtenberg oqarpoq.
