Missingersuut: Partiit saamerliit amerlanerussuteqalissapput

Qinersinermut missingersuut siulleq upperissagaanni Mette Frederiksen ministeriuninngussangatinneqarpoq. Taasinerit 25 procentii sinnerlugit maannamut kisinneqareerput.

DR Nyheder naapertorlugu partiit saamerliit katillugit 90-inik qinigaatitaqassapput, partiillu talerperliit 75-inik qinigaatitaqarlutik qinersinermi ajorsassangatinneqarlutik.

Socialdemokraatit 26,6 procentinit taaguunneqarlutik partiini angininngortussanngorpasipput. Venstre 22,7 procentinit taaguunneqarluni anginerit tullerilissavaat.

Dansk Folkepartiili Folketingimut kingullermik 2014-imi qinersisoqarmat 22,1 procentinit taaguunneqarluni partiit anginerit tulleriligaat maanna 9,2 procentiinnarnit taaguunneqarpoq. Partiip qinersisai taamaalillutik affaannanngorput.  

Partiit sisamat Folketingimut isernissamut periarfissaqarput: Tassalu Stram Kurs, Kristendemokraterne, Nye Borgerlige aamma Liberal Alliance. 

Partii Klaus Riskær Pedersen Folketingimut isissangatinneqanngilaq.

Det Radikale Venstre, SF aamma Det Konservative Folkeparti siuariassangatinneqarput, Enhedslistenilu aamma Alternativet kinguariassangatinneqarlutik.