Misissuineq: Suliffissaaleqilernissamut sillimmasiisarfittaarnissaq akisuallaarpoq
Naalakkersuisut suliffissaaleqilernissamut nammineq sillimmasiisalernissap inuiaqatigiinnut sulisartunullu aningaasatigut iluaqutiisartaanik akornutissartaanillu misissuissasut, Inatsisartut siorna upernaakkut ataatsimiinnerminni aalajangerpaat.
Suliffissaaleqilernissamut sillimmasiisarfik A-kassemik Danmarkimi taaneqartarpoq.
Inatsisartut aalajangiissasut
Naalakkersuisut nunatsinni suliffissaaleqilernissamut sillimmasiisarfittaarnissaq pillugu nassuiaasiartik saqqummiuteqqammerpaat. Inuussutissarsiornermut Suliffeqarnermullu Naalakkersuisoqarfik nassuiaasiortuuvoq.
Nassuiaasiornermi paasisat Inatsisartunut ingerlateqqinneqassapput.
Inatsisartuni ilaasortaasimasoq, nunanut allanut nukissiuuteqarnermullu maanna naalakkersuisoq Steen Lynge (D), siunnersuuteqartuuvoq.
Taassuma sulisartorpassuit sulliviup suliassaaleqineratigut akiliisinnaajunnaarneratigulluunniit matuneqarnerani angerlartitaasarnerat siunnersuutiminut tunngavilersuutigaa. Sulisummi imminut pilersoqqilernissamik tungaanut pisortat ikiorsiissutaannik pisartagaqalernissamik taamaalillutik qinnuteqartariaqalertarmata.
- Akissarsiorunnaarluni pisortat ikiorsiissutaannik pisartagaqalerneq isertitat malunnartumik ikilinerannik kinguneqartarpoq. Inuit tunniusimallutik aalajaallutillu sulilluartut tamaasa Inuiaqatigiit isumagissappagit taava suliffissaaleqilersinnaanermut sillimmasiisarfittaarsinnaanissaq sulisartunut orniginarsinnaanersoq misissortariaqarparput, taanna 2019-imi siunnersuummini allappoq.
Imminut akilersinnaanngitsoq
Suliffissaaleqilersinnaanermut sillimmasiinermik aaqqissuussisoqassappat, taanna ingammik sillimmasiisarfimmi ilaasortanit aningaasalersorneqassasoq, siunnersuummi allaqqavoq.
Nassuiaasiaq saqqummiunneqaqqammerpoq. Inuussutissarsiornermut Suliffeqarnermullu Naalakkersuisoqarfik nassuiaasiortuuvoq. Nunatsinnilu suliffissaaleqilersinnaanermut nammineq sillimmasertalernissaq tamatumunngalu aningaasalersuinissaq inassutigineqanngilaq.
Naatsumik oqaatigalugu: Imminut akilersinnaanngilaq.
Aaqqissuussinermi nammineerussaassappat, kikkulluunniit tassunga ilanngutitinnissaannut ussagaruminaassinnaassapput. Suliamillu ilinniagaqarsimasut ilinniaqqissimasullu suliffissaaleqikkajunngitsut, nassuiaasiami aamma erseqqissarneqarpoq.
Ullormusiassat ikippallaaraangata, suliffissaarunnissamullu aarlerinaatit killeqarpata, sulinermik inuussutissarsiuteqartut ilaasa ilaasortanngornissartik soqutigisarisanngikkaat ilimanartorujussuussaaq, taamaalillunilu A-kasse nammineerussaq pisortaniit tapiiffigineqartarnani utertooruteqartarnaniluunniit aningaasalersoruminaassalluni, nassuiaasiami oqaatigaat.
Savalimmiuni aaqqissuussineq isumassarsiviusoq
ALS-eqarnermi aningaasartuutit
Savalimmiuni aalajangersimasumik najugallit 17-it 64-illu akornanni ukiullit tamarmik A-mik isertitaqartartut ALS-imi toqqaannartumik ilaasortanngortarput.
ALS-ip ukiumut 18-20 millionit koruunit missaat allaffissornermut aningaasartuutigisarpai, taakkunannga 14 millionit koruunit missaat sulisunut 29-usunut 5 millionit koruunillu aningaasartuutinut allanut atortarai, nassuiaasiami allaqqavoq.
50 millionit koruunit missaat Savalimmiut landskarsianit ingerlatsinermut 1995-imi immikkoortinneqarput. ALS-ilu aningaasanik tunniussisussaatitaanerminik naammassinnikkumalluni 50 millionit koruunit missaannik tamatuma kingorna attartorpoq.
Tusarfik: Naalakkersuisut
Nunatsinnili suliffissaaleqilernissamut sillimmasiisarfittaartoqassagaluarpat, savalimmiormiut suliffissaaleqilernissamut sillimmasiinermik aaqqissuussaat ALS (Arbeiðsloysisskipanin) isumassarsiviusinnaavoq.
Aaqqissuussamilli aallarniinerat akisusimasoq, nassuiaasiami allaqqavoq. 1992-imi aallarnerneqarmat, Savalimmiut naalakkersuisui (Lagstyret) 20 millionit koruuninik aningaasaliipput.
Sillimmasiisarfik taanna aningaasanik tunniussisussaatitaanerminik naammassinnissinnaasimanngimmat kingorna 100 millionit koruuninik aningaasaleeqqittariaqarsimasut, nassuiaasiami allaqqavoq.
- Savalimmiormiullu aningaasarsiornerat aatsaat sinneqartoorfiulermat ALS imminut napatissinnaalersimalluni.
Nunatsinni suliffissaaleqilernissamut sillimasiisarfittaarnissaq coronap ajornartoortitsinerani ingalluni ajornakusoornerulissasoq, nassuiaasiami allaqqavoq.
