Misissuinissaq qanoq akeqassanersoq naatsorsorneqarsimanngilaq

USA-mi Isertortumik paasiniaasartut, CIA-p, Kalaallit Nunaata Danmarkillu silaannartaanni timmisartuussisarsimaneragaanerata ataatsimiititaliarsuarmit misissuivigineqarnissaanik Danmarkimi naalakkersuisut aallartitserusunnginnerat aningaasartuutaavallaarnissaanik peqquteqartoq nunanut allanut ministerip Villy Søvndalip tunngavilersuutigaa. Taamaakkaluartorli misissuinissaq qanoq akeqassanersoq naatsorsorneqarsimanngilaq.
Allattoq Carla Davidsen
novembarip 17-at 2011 08:25

Nunanut allanut ministerip Doris Jakobsenimut akissutaani tamanna erserpoq.

- Aningaasartuutissat pillugit oqaaseqarninni tikkuagara tassaaginnarpoq, misissuineq ukiuni arlalinni pisinnaasarmat, misilittakkallu malillugit aningaasartuutit taamaalillutik amerlanerusinnaapput, soorlu Farumimi pisoq nuanniitsoq pillugu misissuisoqarmat taama pisoqartoq, Villy Søvndal allappoq. Tassani unnersuussutigaa Farumip Kommuniani Brixtoftep atornerluisimanera ataatsimiititaliarsuup 2003-mili misissuivigilersimasaa, misissuinerlu suli naammassinngitsoq oqarluni. Farumimi misissuisitsineq 53,4 millionit koruuninik akeqarpoq.

Nunanut allanut tunngasunut Danmarkimi Ilisimatusarfik, DIIS, CIA-p timmisartuussisarsimaneragaaneranik sumulluunniit attuumassuteqanngitsumik misissuisitsilluni allartissassoq, Kalaallit Nunaata Danmarkillu qaammammi uani siusinnerusukkut isumaqatigiissutigigallarpaat. Misissuineq Kalaallit Nunaannit aqunneqassaaq, aningaasatigulli Danmarkimit tapiiffigineqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq