Misissuiffigeqqinnissaa pissarsiaqarnarnerussangatippaat
Tallimanngormat oqaluttuaraarput CIAp misissuiffigineqarnissaa DIIS-ip akuersaarlugu suliarilikkersaaraa. Sapaatip akunnerata siuliani DIIS-ip nunanut allanut ministerimut allakkatigut nalunaarutigaa misissuinissamut toqqammavissat killeqarnerat piffissakilliulernertillu; taamaammallu misissuinissaq killeqartariaqartoq. Nanna Hvidt ullumi KNR-imut paasissutissiivoq Københavnimi aallartitaqarfimmi allagaatit isertat saqqummiunneqarsimanerannut tunngassuteqartut, naalakkersuisuusimasullu USA-mit suliamut persaqqutsisitaasimanerisa qulaajarneqarnissaa utaqqimaarneqartoq.
- Misissuinerup immikkoortua pissanganarneq tikipparput. Allakkatigut nalunaarutigaarput misissuinerup immikkoortuata siulliup pissarsiaqarfigineqarsinnaanerata killeqarnera, maannalu paasinialeruttorparput qanoq pisoqarsimanera. Immikkut misissuititat allat takusinnaanngisaannut tappissuusarput.
DIISip pisortaata Nanna Hvidtip misissuinermi killiffik tigusanik angallassisoqartarsimasinnaaneranik paasissutissanik pissarsiaqarfigineqarsinnaanera qularutigilerpaa.
- USAmi allagaatit isertat ukiut 20-t qaangiunnerini tamanut takusassiarineqartarput. Suliarlu una nutaajoqimmat paasissutissanik pissarsiaqarfigineqarsinnaanera qularnarpoq.
DIISip nalunaarusiaq aappaagu maajip aallaqqaataani saqqummiuttussaavaa, misissuisullu immikkut ilisimasallit paasissutissiisinnaaneri suliap ingerlaqqinnissaanut apeqqutaassasoq Nanna Hvidt erseqqissaavoq.
Misissuisussanik immikkut ilisimasalinnik sisamanik inuttaqartumik DIIS suleqatigiissitaliorsimavoq. Sillimaniarnerli eqqarsaatigalugu suliaqalersussat isumannaallisaanermut ulorianaataannginnersut qulakkeeqqaartinnagu sulilersinnaanngimmata Nanna Hvidtip maanna oqaatigisinnaanngikkallarpaa kikkut suliakkerneqarsimanersut.
DIIS-ip allagai misissuisoqarnissaanik piumasarisaasut nunanut allanut ministerip Villy Søvndalip akornutaassangatinngikkai ullumi aviisimi ullormut saqqummersartumi Politikenimi allaaserineqarpoq.
