Laila Skytte kajumissutsiminik sulivoq: Coronavirus akiorniarlugu pitsanngueqataarusuppunga
Coronavirusimik ersiuteqanngitsut piffisamillu tunineqarsimasut misissortittarfissaat marlunngornermi ammarpoq.
Else Momme, Kommuneqarfik Sermersuumi ineriartortitsinermi siunnersortitut ulluinnarni atorfeqartoq, misissortittarfiup nutaap ammatinneqarnerani ulluinnarni aqutsisutut tassani atorfeqarpoq. Taassamuma ullup ammarneqarfia ingerlalluarsimasutut nalilerpaa.
Misissuisarfik nutaaq
- Misissuisarfik nutaaq Nuummi ammarpoq. Illoqarfiup qeqqani Kalaaliaraasimasumi inissisimavoq
- Coronamik tunillatsissimanermik ersiuteqanngitsunut misissuivissatut atorneqassaaq
- Nunanit allanit tikittut angerlarsimaannarnikullu misissorteqqittussat misissuiffimmi nutaami misissortittassapput
- Misissuisarfik nutaaq Nakorsaaneqarfik Kommuneqarfik Sermersoorlu ataatsimoorlutik pilersitaraat
- Nammineq kajumissutsiminnik sulisut misissuisuupput
- Ullaap tungaaniilli piareersimavugut. Ammaanissamut ullut ulapaarfiusimaqaat, kisianni innuttaasut Air Greenlandimiit piffissalerneqarsimanertik naapertorlugu aggiarujoorput. Utaqqisoqanngilaq, taamaasilluni pissusissamisut ingerlavoq, Else Momme oqarpoq.
Sulerusullutik nalunaarsimasut amerlapput
Misissortittarfimmi nutaami sulisut kommunimi sulisuunerupput, kajumissutsiminillu misissortittarfittaami sulisuullutik.
- Ammaannginnermi misiliiniaannarluta immitsinnut misissorpugut, innuttaasunillu misissuisussanngoratta piareersimalluta. Pingasoriarlunga misissuereerama sungiuppara, meeqqat inuusuttullu pillugit siunnersuisarfimmi MISI-mi pisortaq Laila Skytte oqarpoq.
AAMMA ATUARUK Shazia Olelu misissuiffittaami misissortipput: Sekundtinik marlunnik sivisussuseqarpoq ajornanilu
Taanna kommunimi sulisunut kajumissutsimik suleqataasunut 20-usunut ilaavoq, misissuisarfimmilu sapaatit akunneranut ulluni marlunni sulisarluni. Ikiuukkusuttunillu nassaarniarneq ajornarsimanngilaq.
- Kommunip iluani attaveqaqatigiittarfitsinni allagarsiivugut, ullualunnguillu qaangiutiinnartut nalunaartorpassuupput, taamaammat sulisussarsiorneq ajornartorsiutaasimanngilaq, Else Momme oqarpoq.
Nuuk corona pillugu martsip qaammataani matuneqarmat, Laila Skytte ikiortissaaleqisutut misigisimagami maanna kajumissutsiminik suleqataavoq.
- Nuuk matuneqarmat ikiortissaaleqisutut misigigama, Kommuneqarfik Sermersoorlu suliniummut peqataammat pitsanngorsaaqataarusuppunga. Aamma ulluinnarni suliannit allanit suliaqarnera nuannerpoq, Laila Skytte oqarpoq.
Timmisartut qassit Nuummut tikittassanersut apeqqutaalluni kajumissutsiminnik suleqataasut sapaatip akunneranut marloriarlutik sulisassasut siunertaavoq.
