MIO-p perorsaaneq pillugu atuakkiaa RAL-imit aningaasaliiffigineqartoq
Umiarsuaatileqatigiiffik Royal Arctic Line A/S aamma Meeqqat pisinnaatitaaffiinut sullissivik MIO Ilaqutariinneq nukittooq perorsaanermilu killiliisinnaaneq pillugit atuagaaqqap pilersinneqarnissaanut aningaasaliinissaq pillugu ataasinngornermi decembarip 18-anni isumaqatigiissutigineqarput
Atuagaaraq pilersinneqassaaq MIO-p 2017-ini misissuisitsisimanera tunngavigalugu, Royal Arctic Line tusagassiiutinut taama nalunaaruteqarluni allappoq.
Meeqqat illersuisuata Aviâja Egede Lyngep Royal Arctic Line-p tapersersuinera qujamasuutigaa.
- Meeqqat pisinnaatitaaffii malissagutsigit, aamma ilaqutariittut qanoq iliuuseqarsinnaanerluta ilisimasariaqarparput. Taamaattumik pisariaqartitsisunut najoqqutassanik tigussaasunik peqartitsinissaq pingaaruteqarpoq, Meeqqat illersuisuat, Aviâja Egede Lyngetaama oqarpoq.
Umiarsuaatileqatigiiffiup Namminersorlutik Oqartussanit pigineqartup aningaasaliineq tulluusimaaruutigaa.
- Suliffeqarfittut inuiaqatigiit akornanni akisussaaqataasutut tulluusimaarutigaarput atuagaaqqap piviusunngortinnissaanut peqataasinnaagatta, qularinngilarpummi inuiaqatigiinni nuannaarutaajumaartoq, Royal Arctic Linemi tusagassiinermut pisortaq Ann-Britta A. Olsvig taama oqarpoq.
Atuakkiarineqarnera, assiliartassai, assiliartalersuineq naqiterneqarnera kiisalu siammarterneqarnissaa ilanngullugit, 130.000,00-inik naleqassaaq.