MIO nersornaasiuttakkaminut piukkunnartussarsiortoq

MIO-p nersornaasiuttagaa meeqqat pisinnaatitaaffiisa naammassineqarnissaat anguniarlugu sullissinermut pitsaasumut nersortarialimmullu nersornaasiinerusoq, MIO tusagassiorfinnut nalunaaruteqarluni taama allappoq.

MIO-p nersornaasiuttagaa siorna Lena Ravn Jensenimut tunniunneqarpoq, nammineq kajumissutsiminik Ilulissani meeqqanik inuusuttunillu timersornikkut sullissilluarnini pillugu nersornaaserneqarluni.

Nersornaasiuttagaq NunaFonden suleqatigalugu tunniunneqartarpoq, nersornaatip aningaasartai 20.000 koruuniusut aningaasaateqarfimmit aningaasaliissutaallutik.

MIO-p nersornaasiuttagaa novembarip 20-ani tunniunneqassaaq, ullormi Naalagaaffiit Peqatigiit Meeqqanut isumaqatigiissutaata malunnartinniarneqarnerani.

Piukkussaminnik innersuusserusuttut oktobarip 30-ata tungaanut periarfissaqarput.