MIO-mit nersorneqartoq imminut toqunneq pillugu: Angutit uagut immaqa matoqqavallaarpugut
Nunatsinni Meeqqat Pisinnaatitaaffiinut Sullissiviup MIO-p ukiumoortumik nersornaasiuttagaa Ilulissaneersumut ilinniartitsisunngorniamut, Lars Møllerimut, tunniunneqarpoq.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit, Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Tusaannga pillugu uani paasisaqarnerusinnaavutit.
Taanna imminut toqunnissamik pinaveersaartitsiniarluni nammineq piumassutsini atorlugu ukiut pingasut kingulliit suliaqartuuvoq.
Taassuma MIO-mit nersornaaserneqarnissani takorloorsimanngikkaluarpaa:
- Tupappunga tassani sianerfigitikkama, ulloq pikkunanaarpara, asuluunniimmi kammassuarigaluama inuuiani. Allaanngilaq tunineqaannarlunga, taamatut pineqarnissannik ilimasunnikuunngikkaluarpunga.
AAMMA ATUARUK Imminut toqunnissamik pinaveeersaartitsinermik sulialik MIO-mit nersornaaserneqartoq
Lars Møllerip qanigisani arlallit ukiut ikittunnguit ingerlaneranni toqukkut annaavai.
- GU-rama ukiut pingasut ingerlaneranni angajoqqaaveruppunga. Nasartaartussaallunga 2020-mi tamakkerput, anaanaga ataatassaga aamma ataataviga GU naammassileriga imminut toqunnikuuvoq.
Nunatsinni 2021-mi imminut toquttut 49-pput, 2020-milu 41-llutik. Tassa imminut toquttut ukiuni kingullerni tallimani ikiliartoratik amerliartuaarusaarsimapput.
Siornalu imminut toqoriaraluarsimasutut nalunaarsorneqartut 90-iupput. Tassa imminut toqoriaraluarsimasut ukiuni kingullerni tallimani amerliartoratik ikiliartuaarsimapput.
2021-milu imminut toqunnissamik sioorasaarisimasutut nalunaarsorneqartut 1309-upput. Tassa 2017-imiilli amerleriangaatsiarsimapput, 2017-imimi imminut toqunnissamik sioorasaarisimasutut nalunaarsorneqartut 832-upput.
Kisitsisit qulaani saqqummiussat politiinut nalunaarutiginninnernik tunngaveqarput. Tassa taakku nalunaarsorneqarsimasunit amerlanerusut ilimagineqarpoq.
Tusarfik: Kalaallit Nunaanni Politiit ukiumoortumik 2021-mi nalunaarsugaat
Taamatullu aannaasaqareernermi kingorna inuunermut isiginninnera iliuuseqarusussusialu allanngorpoq.
- Eqqarsartarnikuuvunga sooq paasisinnaannginneriga tunniutiinnartoqartartoq, nammineq angajoqqaaverullunga GU naammassillugu tassanngaanniit sulerusussusera annertoorujussuanngornikuuvoq. Taavalu ajoraluartumik oqareernertut ilaquttakka kammalaatikka timersoqatigisartakkakkalu toqukkut qimaguttut tulleriiaarnikuupput.
Lars Møller MIO-p suliniutaanut Qamanimut ukioq manna suleqataavoq. Suleqataanermini ilaatigut nammineq imminut toqunnissamik eqqarsaateqartarallarami qanoq misigisimasarnini oqaluttuarai, tamannalu kinguneqarmat qujamasoqaaq.
- MIO peqatigalugu Qamanimi suliaqaratta , filmiliaq saqqummernikuuvoq naalakkersuinullu ingerlateqqinneqarnikuulluni. Tassani assut pissarsigama, nammineerlunga oqaluttuartarpunga qanoq misiginikuunerlunga, meeraaninniit massakkumut sumut qanorlu killinnerlunga.
- Tassani tusagara assut nuannaarutigigakku, oqaluttuarama allat aatsaat oqaluttuarusulersut. Taava tassanngaanniit eqqarsaat takkunnikuuvoq, angutit immaqa matoqqavallaarluta. Immaqa angutimik oqaluttuartoqartoq tusaagunikku immaqa ammarsinnaavara uku inuusuttut nukappiaqqat aammalu angutit oqaluttuarsinnaalernissaat.
Suliat assigiinngitsut ingerlakkai
Lars Møller imminut toqunnissamik pinaveersaartitsiniarluni sammisassaqartitsiniarlunilu upernaaq Qaanaamiippoq, unalu qaammat naappat taavunnaqqissalluni.
Massakkullu Ilulissani inuusuttut akeqanngitsumikaamma sammisassaqartinneqartarnissaannik borgmester peqatigalugu suliniuteqarluni.
Taakku saniatigut Upernavimmiit aamma aggersarneqarluni KNR-imut oqaluttuarpoq, sulianilli tulleriiaariniarpoq.
Taassumammi nersornaaserneqarnini inuttut pissarsiaqaatigalugu oqarpoq.
- Soorluluunniit nukissanik tunineqaqqiinnarlunga imminut toqunnissamut akiuiniarnissamut peqataarusunninnut.
- MIO-miit nersorneqarnera atorluakutsuussavara. Suli sulerusussusermut annertuumik tunisimmat soorunami atorluakutsuussavara inuttut aamma pissarsissutigigakku, 35-nik ukiulik Lars Møller oqarpoq.
