MIO: Meeqqanik isumaginninnikkut sulineq unamminartoqarpoq
MIO-p kommuninit sisamaasunit inunnik isumaginninnermut sulianik sullissisisartut aqutsisullu isumaat misilittagaallu pillugit misissuisitsinermut atatillugu apersorsimavai:
- Nalunaarusiap siunertarinngilaa sullissisut avammut ajortumik isigineqartilernissaat, taakkumi annertuumik suliaqartuupput - akulikitsumik sulinermi atugassarititaasut pitsaanngilluinnartut atorlugit sulisarput, kisiannili inunnik sullissinermi atugassarititaasut pitsanngorsaaviginiarlugit qaammarsaaviginiarneqarput, aamma kinguneqartussanik siunnersuuteqarnissaq siunertaavoq, Meeqqat Illersuisuat Aaja Chemnitz Larsen, tusagassiuutinut nalunaarummi ilaatigut allappoq.
Ajornartorsiutit pingasut pingaarnerit nalunaarusiami sammineqarput. Siullertut: Sumiiffinni sulisut ikippallaarnerat, meeraq atugarliortoq ikiorneqarnissamullu pisariaqartitsisoq nalunaarutigineqaraangat inunnik sullissisut qanoq sukkatigisumik qisuarisarsinnaanerannut sunniuteqartarpoq.
Aappassaanik: Inunnik sullissisut piginnaanngorsaqqinnissaanik pisariaqartitsisoqarpoq, inunnik sullissinermi suliassat arlalinnik ajornartorsiutitaqartut suliarinissaannut atortussaqaqqullugit.
Pingajussaanillu: Inunnik sullissisartut iliuuseqarsinnaanissaminnut periarfissaasa qulakkeerneqarnissaat pisariaqartinneqarpoq, assersuutigalugu inissiivissat katsorsaanermilluunniit neqeroorfiusinnaasut - taakku amerlassutsimikkut naammattuusariaqarput, meeqqallu ilaqutaasalu ajornartorsiutaannik aaqqiiniarnissamut piginnaasaqartariaqarlutik, MIO nalunaarusiami allappoq.
- Tamakku tamaasa aaqqiiviginiarlugit iliuuseqarfigisariaqarpagut, meeqqat pitsaasumik peroriartornissaat qulakkiissagutsigu, Meeqqat Illersuisuata Aaja Chemnitz Larsenip nalunaarummi oqaatigaa.
