MIO Meeqqallu illersuisuat UNICEF-miit nersorneqartut
Kalaallit Nunaanni Meeqqat Pisinnaatitaaffiinik Sullissivik MIO ullumi sapaammi UNICEF-ip ukiumoortumik nersornaasiuttagaanik pissarsivoq.
Ukiut tamaasa UNICEF inummut ataatsimut kattuffimmulluunniit nersornaammik tunniussisarpoq, nersorniarneqartarlutik Danmarkimi nunaniluunniit tamalaani inuit meeqqat pillugit ukiuni arlalinni suliaqarsimasut. Ukioq mannalu nersornaat MIO-mut meeqqallu illersuisuannut Aviaja Egede Lyngemut tunniunneqarpoq.
UNICEF nunat tamalaat kattuffissuaraat sorsunnersuup aappaata kingorna decembarip 11-iani 1946-mi pilersinneqarsimasoq. UNICEF-ip anguniagaraa meeqqat annannissaat, illersorneqarnissaat aammalu ineriartornissaat FN-p meeqqat pisinnaatitaaffii pillugit malitassiaa najoqqutaralugu ingerlasumik. Kattuffissuaq ikiueqqaarnermut, ajunaarnersuaqartillugu nunarsuarmi tamarmi suliniaqatigiiffiuvoq. - UNICEF-illlu pingaarnertut suliaraa meeqqat nunarsuarmi tamarmi annassasut inuunermilu aniguissasut. Pingaarnertullu meeqqat atugarliortut ikiorneqassasut, kattuffissuaq nunarsuarmi tamarmi meeqqat pillugit suliniaqatigiiffiuvoq, taakku nittartakkaminni taama allapput.
UNICEF tassaavoq kattuffissuaq, nunarsuarmi meeqqat inuunermi aniguilluarnissaannik suliniaqatigiiffiusoq.
- MIO meerarpassuarnut inuusuttorpassuarnullu pitsaasumik iliuuseqartarsimavoq. Meeqqat oqaatigiumasaannik avammut oqaaseqartarpoq meeqqallu nipaat inersimasut nipaattulli pingaartigisoq ersarissartarlugu, taamaattumik nersorniarneqarnissaat pissusissamisoorpoq. Jesper Lok Danmarkimi UNICEF-ip siulersuisuini siulittaasuusoq tusagassiutinut nalunaarummi allappoq.
Meeqqat illersuisuat attortisimallunilu nuannaarpoq
Meeqqat illersuisuata nuannaarlunilu attortisimaartup ataqqinaammik nersornaat tiguaa. Nersornaallumi UNICEF-meersuuvoq, tamannalu Aviaja Egede Lyngemut isumaqarnerulersitsivoq.
- Attortinnarpoq, nersornaammi UNICEF-imeersuuvoq, suliatsinnimi anguniakkagut taakkuupput. Tupaallannarpoq assullu pisoq annertuvoq. Pingaaruteqarpoq immitsinnut akuersaaqatigiinnissarput matumanilu nersornaatisinerup tamanna takutippaa, Aviaja Egede Lynge oqarpoq.
- Ukiut qulit MIO atuuppoq, iliuuseqartarnermigut aammalu angalasarnermigut angalareernerullu kingorna nalunaarusiortarnermigut nunatsinni meeqqat atugaannik piviusunik ersersitsisarsimavoq, meeqqat misigissusaat iserfigilluarlugit aammalu unneqqarissumik pissuseqartumik, UNICEF-ip tusagassiutinut nalunaarutaani ilaatigut taama allassimasoqarpoq.
Aviaja Egede Lynge meeqqat inuusuttullu tusaaneqarnissaannik sorsuuteqartuusup meeqqanut ilaqutariinnullu aamma qujaniarpoq.
- Isumaqarpunga meeqqat ilaqutariillu una nersornaatisiarigaat, taakkumi tatigaluta oqariartuutigisaminnik aqqutigaluta suaaruteqartuupput.
- Nersornaat taakku aamma nersornaatisiaraat, Aviaja Egede Lynge KNR-mut oqarpoq.
