Minneapolisimi eqqissiviilliornerit sakkutuunit arlalinnit orniguffigineqartariaqartut
Amerikami oqartussat Minneapolisimi illoqarfinnilu allani pisoq pillugu eqqissisaaniarsaripput.
Angut qernertormioq politiimit qajassuaalliorfigineqarluni aalajangersimaneqarluni toqunerata kingorna, akerliussutsimik takutitsisoqarnerani Minneapolisimi aqqusinermi eqqissiviilliortoqalerpoq. Taamaaliornerlu illoqarfinnut allanut aamma anngulluni.
Minnesotasimi aatsaat politiinik taama amerlatigisunik 1929-mili sassartitsisoqaqqittoq, CNN allappoq.
Tamannali naammanngilaq. Aqqusinerni eqqissiviilliornerit , ujajaanerit ikuallatsitsinerillu suli ajornartorsiutaapput.
- Minneapolisimi akerliussutsimik takutitsineq angummut qernertormiumut toqutaasumut attuumassuteqarunnaarpoq. Maannali inuiaqatigiinnut saassussinermut akerliussutsimik takutitsineq sanguvoq, naalagaaffik naalagaaffeqatigiinni ilaasumi guvenøri, Tim Walz oqarpoq.
AAMMA ATUARUK Minneapolisimi akerliussutsimik takutitsisut politeeqarfik ikuallatsikkaat
Sapaatiuppat Nationalgardenimiit Minneapolisimiillu sakkutuut 1700-t missaanniittut ikiuukkiartussasut, Generalmajori Jon Jensen Nationalgardenimeersoq oqarpoq.
Eqqissiviilliornerit USA-mi illoqarfinnut arlalinnut siaruaapput.
Akerliussutsimik takutitsinerit eqqissiviilliornerillu Washington D.C.-mi, New Yorkimi, Atlantami aamma Phoeniximi nalunaarutigineqarput.
Houstonimi Texasimilu inuit 200-t tigusarineqartut CNN allappoq.