Ministeriusimasoq: Kalaallit pilliutigineqartutut pissusilersorput
Danskit aviisiat Information isertuussaasunik saqqummersitsivimmit Wikileaks-imit saqqummiunneqaqqammersut aallavigalugit taamatut allaaserisaqarpoq.
Pituffimmi amerikamiut sakkutooqarfiata eqqaani qaartartup atomitallip tammaaneqartup qinngulanernik radioaktiviusunik ulorianartorsiortitsinissaanik kalaallit ernumanerat, illersornissamut ministeriusimasup Søren Gadep kalaallit pillilutigineqartutut pissussulersornerannik taavai.
Taammaattumik nunanut allanut isumannaallisaanermullu oqartussaafiit annerit Kalaallit Nunaannit oqartussaaffigineqalertariaqartut, Siumut sinnerlugu Folketingemi ilaasortaq Lars-Emil Johansen oqarpoq, Søren Gadep kalaallit pilliutigineqartutut misigisimanerannik oqarnera illuatungilerlugu.
- Danskit pissaanermik tigumminnuttut paasinnittariaasiat malillugu pilliutigineqartutut isiginninnerannik taaneqarsinnaavoq, danskit ataqqinnissuseqaratik akisussaaffeqanngitsumillu nunatsinni pissusilersorpata, uagut kalaallit tamakkua pillugit naammagittaalliorutta. Ingammik danskit amerikamiunut iluareqqusaaraangamik. Danskit amerikamiullu kalaallinik misilittaanerannik akerliunermik taasariaqarpoq, tamannalu tunngavilersuutaavoq, Lars-Emil Johansen aviisi Informationimut oqarpoq.
