Ministeriunerusimasoq unnerluutigineqarpoq
Suliassaq tamanna pingaarnertut inuttaasup politikkikkut malersuinerunerarpaa, taamaattumillu suliassap piaarnerpaamik unitsinneqarnissaa piumasaralugu.
Aningaasarsiornikkut ajornartoornermi Haardep inissisimanini pillugu naalagaaffiup eqqartuussiviani sassartinneqarpoq. Tassa 2008-mi ukiakkut aningaaseriviit annerit tamarmik tulleriiaarlutik ajutoornerisa aningaasarpassuarnillu annaasaqarnerisa kingorna Islandimi naalagaaffiup tigusariaqarsimammagit.
60-inik ukiulimmut Geir Haarde-mut unnerluutiginninnerni, aningaasarsiornikkut kanngunartuliat pillugit naalakkersuisut nalunaarusiaat itisiliisoq, upernaaq saqqummiunneqartoq tunngavigineqarpoq. Nunami aningaaseriviit ajornartorsiornerujussuinut aarlerisaarutinut isiginngitsuusaarsimasutut taanna pasillerneqarpoq.
Taamaattorli Haarde Islandimi aningaaseriviit ajutoornerinut akisussaasuunnginnerarpoq. Taanna isumaqarpoq, naalagaaffiup eqqartuussivia, inatsisartuni ilaasortanik arfineq pingasunik aamma inatsisilerituunik arfineq marlunnik eqqartuussisulik, suliamut attuumassuteqarpallaartunik eqqartuussisulerluni, naalakkersuinikkut isiginnaartitsinerusoq.
- Unnerluutiginnissutit quianaannarput. Ingammik aningaaseriviit ajutoornerat sioqqutitsiarlugu, naalakkersuisuma eqqortunik aalajangiisimanerat paasinarsimmat, Haarde oqarpoq.
Taassuma Islandimi naalagaaffiup eqqartuussiviani suliassaq siullerpaaq, tassaanerpaa "naalakkersuinikkut malersuineq".
- Islandip oqaluttuarisaanerani naalakkersuinermik sunnersimaneqartumik siullerpaamik eqqartuussisoqarpoq, ministeriunerusimasoq oqarpoq.
Haarde eqqartuussinermi pisuutinneqassaguni ukiut marluk angullugit parnaarussaasinnaavoq.