Ministeriuneq: Tyrkiami sakkutuut pissaanermik tiguaariarput
Tyrkiami sakkutuut nunami pissaaneq tiguarniarsarileruttorpaat, Tyrkiami ministeriuneq, Binali Yildirim, TV-eeqarfimmut NTV-mut oqarpoq.
Taasuma ilanngullugu oqaatigaa pisoq tiguaanertut isigineqassanngitsoq, sakkutuulli unioqqutitsillutik pissaanermik tiguaariaraluartut oqaatigalugu.
- Sakkutuut ilai oqartussat akisussaasut avaqqullugit inatsisinik unioqqutitsillugit tiguaariarput, Yildirim NTV-mut oqarpoq.
Naalakkersuisut qinikkat nunami suli oqartussaasuupput, naalakkersuisummi innuttaasut oqarpata aatsaat tunuassapput, Yildirim naqissusiivoq.
Qamutit sorsugiutit Atatürkip mittarfiata eqqaaniittut Tyrkiamiut TV-eeqarfianit assilineqarsimapput.
Timmisartullu timmisartoqarfik aqqutigalugu angalasussat tamarmik taamaatinneqarsimasut, Reuters ilisimatitsivoq.
Nittartakkatigut naapittarfinnut soorlu Facebook, Twitter aamma Youtubemut iserniarneq ajornakusoortoq nittartakkanik nakkutilliisut oqarsimasut Reuters aamma allappoq.
Sakkutuut tiguaariarnerat annertusoq
Tusarfik EU-meersup Tyrkiamik ilisimannittup oqaatigaa sakkutuut pissaanermik tiguaanissaat ilimanaateqartoq.
Tiguaaniarnermi sakkortuvoq. "oberstialuinnarnit" tiguaariartoqanngilaq, tusarfik EU-meersoq, pisumi malinnaasoq, oqarsimavoq.
Tiguaaniarneq piareersarluagaarpasippoq sukkutuunit pingaarutilinnit aaqqissugaq, tusarfik oqarsimasoq Reuters allappoq.
- Mittarfiit tiguareerpaat ilimanerlunilu tv-eeqarfiit tiguassagaat, tusarfik oqarsomavoq. Tamanna pisimavoq TV-eeqarfiup sakkutuunit peqqussummik sukannersumik aqutsisoqalerneranik oqariartuuteqanngitsiarnerani.
Tusarfik aamma oqarsimavoq sakkutuut Istanbulimi piffiit arlallik pilersaarusiukkamik tiguaqqagaat.
- TIguaariarnerup annerttussusaa eqqarsaatigigaanni takorlooruminaappoq tiguaanavianngitsut, tusarfik EU-meersoq oqarpoq.
EU-mi diplomati alla Reutersimut oqarsimavoq tikiamiut Tyrkiamiut aallartitaat nereqatigeruttorlugu tiguaaniartoqalillarmat ataatsimiinneq unittariaqarsimasoq.
Akunnittarfimmiiginnaritsi
Nunanut allanut misitereqarfiup Twitterimi oqaatigaat Tyrkiami sakkutuut tiguaaniarsarisut. Taamaammat Qallunaa (kalaallit taakununnga ilaallutik, aaq.) akunnittarfigisaminniiginnassasut.
Ikiorneqarnissamik pisariaqartitsisut oqarasuaammut +45 33 92 11 12-mut sianersinnaapput.