Ministeriuneq: Oqaluttuarisaanermik saammasseqatigiinneq ataatsimut siunissamut tikkussivoq

Folketingimi ukioq nutaaq ullumi aallartimmat Christiansborg inoqarluarpoq.

Qinersisoqangajalernera Christiansborgimi paarlersuarni kisimi tusarsaagaluartoq ministeriunerup ileqquusumik ammaanersiornermi oqalugiaataani sammisat allat maluginiagassaapput.

Mette Frederiksenip (Soc.dem.) nunarput ilaatigut eqqaavaa, tassanilu pisimasut nuanninngitsut aammali ataatsimut siunissaq qaamasoq oqaatigai.

Ministeriuneq: Kalaallit Nunaannut innarliisimavugut

Oqaluttuarisaanerup qulaajaaffigineqarnissaa, Danmarkip Kalaallit Nunaatalu ukioq manna juunimi isumaqatigiissutigaat. Pingaartumik Sorsunnersuup kingulliup kingorna maannamullu pisimasut qulaajarneqassallutik.

Pisimasut maanna oqallisigineqarnissaat ministeriunerup pingaaruteqarsorai.

- Danmark nunasiaateqartuusimavoq. Pingaartumillu Kalaallit Nunaat innarlersimavarput, iliuuseqarfigissallugit uagut danskit ajornakusoortitatsinnik. Pisulli pereerput. Tamaasalu isummerfigisariaqarpagut. Ajunngitsut ajortullu.

AAMMA ATUARUK Ministeriuneq misileraataasimasunut utoqqatsertoq: Naleqqutinngitsumik kingunerluuteqartoqarneranik kinguneqarpoq

Mette Frederiksenip taamaalilluni Danmarkip nunasiaateqartuusimanerminut qanoq isummernissaanut siunnersimavoq.

Oqaluttuarisaanermi pisimasoq iliuuseqarfigineqartoq assersuutigineqarsinnaasoq tassaavoq ministeriunerup ukioq manna siusinnerusukkut Nuummukarluni meeraanerminni misileraatigineqarsimasunut 22-nut iliuuserineqarsimasunut utoqqatsissuteqarnera.

Taanna taamani oqarpoq:

- Nalaatasi inuppalunngillat kukkunerullutillu.

- Aalajangiiffigisinnaavarput akisussaaffillu tigullugu isumaqarpunga: utoqqatserpunga, oqaatigissallugu eqqortuusoq, ministeriuneq oqarpoq.

Kalaallit Nunaat, Savalimmiut Danmarkilu naalagaaffeqatigiinnerup iluani naligiinnerusumik inissisimajartuinnartut, ministeriunerup ammaanersiornermi oqalugiarnermini aamma oqaatigaa. Naalagaaffeqatigiinnerup nutarterneqarneranik nukittorsarneqarneranik malitseqarsimasoq, taanna isumaqarpoq.

- Savalimmiut, Kalaallit Nunaat Danmarkilu naligiinnerusumik suleqatigiilersimapput. Nunat pingasut taakku ataqqeqatigiinnerulerput. Nunat pingasut taakku naalakkersuisui ingerlaavartumik aaqqissuussaanerusumillu naapittalerput.  Nunanut allanut, sillimaniarnermut illersornissamullu politikkimut aamma tunngasuni.

- Naalagaaffeqatigiit ullutsinni pisunut naleqqunnerusumik suleqatigiilersinnaasimapput. Nunat tamalaat pillugit unammilligassat pillugit, pilliuteqaratalu, suleqatigiissuteqarsinnaalerluta, Mette Frederiksen oqarpoq.

Naalagaaffeqatigiinni nutarsaaniarnermi Mette Frederiksenip ministeriunerani nunanut allanut, sillimaniarnermut illersornissaqarfimmilu politikkimik eqqartuisarfimmik ataatsimiititaliaq ilaatigut pilersinneqarpoq.

Ataatsimiititaliarli arlaleriarluni iluaquteqannginnerarlugu isornartorsiorneqarnikuuvoq.

AAMMA ATUARUK Múte B. Egede kamattoq: Danskit sillimaniarnermut isumaqatigiissutaat pillugu ilisimasaqanngilagut

Naak Mette Frederiksenip qinersinissamik ullumikkut suaaruteqarnissaa amerlasuut ilisimagisimagaluaraat taassuma ammaanersiornermi oqalugiaammini qinersinissaq eqqaanngilaa.

Qinersinissap aqagu suaarutigineqarnissaa maanna naatsorsuutigineqalerpoq, Radikale Venstremmi ministeriunermik tatiginnikkunnaarlutik naalakkersuisunik uppisitsiniassanngikkunik sisamanngorneq killiliunnikuuaat.