Ministeriuneq ataatsimiinnermut peqataassanngilaq
Ministeriunerup Lars Løkke Rasmussenip ataatsimiinissami peqataanissaa illutungiliuttunit piumasarineqaraluarpoq, taamaakkaluartoq peqataasinnaannginnera illutungiliuttunit akuersaarneqarpoq.
- Ataatsimiinnerup piaartumik pinissaa anguniaratsigu ministeriunerup ataatsimeeqataasinnaannginera akueraarput, nunanut allanut ataatsimiititaliap siulittaasuata tullia Mogens Lykketoft Socialdemokratineersoq oqarpoq.
Ministeriunerup pisumut kingusinnerusukkut ilanngunneqarsinnaanissaa avaqqunnneqarsinnaanngitsoq Mogens Lykketoft isumaqarpoq.
Taanna Radikalit nunanut allannut tunngassuteqartunik oqaaseqartartuannit Niels Helveg Petersenimit taperserneqarpoq.
- Maannakkut pisut aallaavigalugit pissusissamisoorpoq, nunanut allanut ministerip Lene Espersenip pineqartoq saqqummiuppagu, taassumami saqqummissai naalakkersuisut isumaannut naapertuummata, Niels Helveg Petersen oqarpoq.
Tigusanik unioqqutitsilluni timmisartumik angallassisarsimanermik pasilliuteqarneq pillugu danskit naalakkersuisui folketingimut kukkusunik saqqummiussaqarsimassappata, Niels Helveg Petersenip neriuutigaa tallimangorpat tamanna akissutissarsineqarumaartoq.
